Angliýanyň çempionatynda “Arsenal” myhmançylykda “Liwerpul” bilen duşuşyp, zerur bolan 2 utugy ýitirdi. Çekeleşikli geçen oýunda “Arsenal” iki atdaş futbolçylarynyň – Gabriel Martinelliniň 8-nji minutdaky hem-de onuň pas bermeginde Gabriel Žesusyň 28-nji minutdaky gollary bilen 2-0 öňe saýlandy. Ýöne ruhdan düşmedik “Liwerpul” 1-nji ýarym tamamlanmanka Mohamed Salahyň goly bilen aratapawudy 1 gola düşürdi. Salah 52-nji minutda hasaby deňläp hem bilerdi. Ol bellenen penaltini dürs urup bilmedi (top meýdançanyň daşyna gitdi). Duşuşygyň tamamlanmagyna 3 minut galanda, Robert Firmino hasaby deňlemegi başardy. Oýnuň soňky minutlarynda “Liwerpula” öňe saýlanmaga 2-3 sany örän amatly pursat dörese-de, derwezeçi Ramsdeýli geçmek olara başartmady. Bu deňlikden soň “Liwerpulyň” “Premier Ligada” hiç hili çempion bolmak mümkinçiligi galmady. Salah “Liwerpulda” bassyr 2 gezek penaltini dürs urup bilmedi.
1 oýny kem “Arsenaldan” 6 utuk yzda barýan “Mançester Siti” myhmançylykda “Southemptony” 4-1 hasabynda ýeňdi. Duşuşykda 2 gezek tapawutlanan Erling Holannyň çempionatdaky gollarynyň sany 30-a, karýerasyndaky gollarynyň sany-da 200-e ýetdi.
