Ispaniýaly tälimçi Pep Guardiolanyň tälim berýän “Mançester Siti” topary Germaniýanyň “Leipsig” toparynyň horwatiýaly goragçysy Ýoşko Gwardioly düzümine goşdy. Iňlis kluby 21 ýaşyndaky oýunçy bilen 5 ýyllyk şertnama baglaşyp, nemes klubuna-da onuň transfer tölegi hökmünde 90 million ýewro berer. Şunlukda, Gwardiol iň gymmat goragçy bolup, ol 2019-njy ýylda “Mançester Ýunaýtede” transfer bolan Harri Maguaýryň 87 million ýewrolyk rekordyny täzeledi.
Internet maglumatlaryna görä, “Mançester Sitiniň” goşmaça ýene-de 10 million ýewro hem bermeli bolmagy mümkin.
Gwardiol “Leipsigde” 2 möwsüm çykyş edip, ol 2021-nji ýylda “Dinamo Zagrebden” transfer bolupdy.
Gwardiol “Mançester Sitide” 24-nji belgili köýnekçäni geýer. Ol “Leipsigde” 88, “Dinamo Zagrebde”-de 52 oýunda meýdança çykypdy.
