UEFA Çempionlar Ligasynda pleý-off tapgyryň jogap duşuşyklary-da oýnalyp, 2023/24 möwsümi üçin toparçalarda çykyş etjek 32 klubuň ählisi hem belli boldy. “Galatasaraý”, “Braga”, “Ýang Boýz”, PSW, “Kopengagen” hem-de “Antwerpen” toparlary soňky 6 ýollanmany alan klublar bolmagy başardy.
Bir hepde öň Norwegiýadan ýeňiş (3-2) bilen dolanan “Galatasaraý” topary öz meýdançasynda “Molde” toparyny 2-1 hasabynda utdy. Gollary Ikardi (7 p) bilen Anhelinýo (90+3) geçirdi. Bu ýeňişden soň “Galatasaraý” 3 ýyldan soň 17-nji gezek UEFA Çempionlar Ligasynda çykyş eder.
Edil “Galatasaraý” ýaly 2 ýerde-de ýeňiş gazanan başga bir topar Portugaliýanyň “Braga” kluby boldy. Öz meýdançasynda 2-1 ýeňiş gazanan “Braga” topary Gresiýanyň “Panatinaikos” toparyny myhmançylykda-da 1-0 hasabynda ýeňlişe sezewar etdi. Portugal klubuna ýeňiş getiren ýeke-täk goly 88-nji minutda Bruma geçirdi. Soňky gezek 2012/13 möwsüminde gatnaşan “Braga” topary 10 ýyldan soň 3-nji sapar UEFA Çempionlar Ligasyna wekilçilik eder.
1-nji duşuşygy golsuz geçen oýnuň jogap duşuşygynda Şweýsariýanyň “Ýang Boýz” topary öz meýdançasynda Ysraýylyň “Makkabi Haýfa” toparynyň derwezesinden jogapsyz 3 gol geçirdi. Gollary Itten (23), Sek (28, ö.d.) hem-de Ugriniç (46) derwezä girizdi. “Ýang Boýz” topary 1 ýyllyk arakesmeden soň 3-nji gezek Çempionlar Ligasynyň toparçalarynda çykyş eder.
Niderlandlaryň wise-çempiony PSW topary öz meýdançasynda Şotlanduýanyň “Reýnjers” klubunda 5-1 hasabynda üstün çykdy. Şotlandiýada 2-2 deňme-deň oýnan klublaryň jogap duşuşygyndaky gollary PSW üçin Saibari (35, 53), Luuk de Ýong (66), Weerman (78) hem-de Goldson (81, ö.d.) derwezä girizdi. Glazgolylaryň ýeke-täk goluny bolsa, gol geçirmekdäki ökdeligi bilen tanalýan sag gyraky goragçy Jeýms Tawernie (64) öz adyna ýazdyrdy. Netijede, 7-3 öňe saýlanan eýndhowenliler 17-nji gezek UEFA Çempionlar Ligasynyň toparçalarynda çykyş etmäge hukuk gazandylar. PSW topary soňky gezek 2018/19 möwsüminde ýaryşa gatnaşypdy.
Daniýanyň “Kopengagen” topary-da toparçalarda çykyş etjek klublaryň biri boldy. Polşadan iň kiçi hasaply ýeňiş bilen dolanan “Kopengagen” öz meýdançasynda şol üstünligini saklamagy başardy. Çekeleşikli geçen oýunda “Kopengagen” Wawronyň 35-nji minutdaky ajaýyp goly bilen 1-0 öňe saýlandy. Ýöne duşuşygyň tamamlanmagyna 3 minut galanda “Rakuw” topary Zwolinskiniň goly bilen hasaby deňlese-de, bu olara ýeterlik bolmady. Şunlukda, geçen möwsüm taryhynda ilkinji gezek çempionlyk gazanan “Rakuw” toparyna bu ýeňşiniň üstüni Çempionlar Ligasy bilen ýetirmek başartmady. “Kopengagen” yzly-yzyna 2-nji, umumylykda-da 6-njy gezek toparçalara gatnaşar.
Maý aýynda 66 ýyldan soň taryhy çempionlyk gazanan Belgiýanyň “Antwerpen” topary Mark Wan Bommeliň tälimçiliginde ýeňişden ýeňişlere beslenýär. Gresiýanyň AEK toparyny öz meýdançasynda 1-0 hasabynda ýeňen “Antwerpen” garşydaşyndan myhmançylykda 2-1 üstün çykdy. Oýnuň 1-nji ýarymy golsuz tamamlanyp, 73-nji minutda Kerk myhmanlary öňe saýlady. Grekler bu gola 90-njy minutda Arauho bilen jogap berdi. 90+5-nji minutda bolsa Balikwişa oýna soňky nokady goýup, “Antwerpene” ýeňiş getiren oýunçy boldy. Şeýlelikde, “Antwerpen” topary UEFA Çempionlar Ligasyna ilkinji gezek gatnaşmaga hukuk gazandy. Olar ýaryşyň irki ýyllarynda Ýewropanyň Çempion Klublarynyň Kubogy ady bilen geçirilýän döwürlerinde, 1957/58 möwsüminde gatnaşypdylar. Umumylykda UEFA-nyň 1-nji derejeli klub ýaryşyna 2-nji gezek gatnaşýan “Antwerpen” bäsleşik UEFA Çempionlar Ligasy adyny alanyndan soň bu ýerde çykyş etjek 149-njy klub hökmünde hasaba alyndy.
