Filippinlerde geçirilýän basketbol boýunça 19-njy Dünýä Kubogynyň ýarym finalynda garaşylmadyk netije hasaba alyndy. Çekeleşikli geçen ýarym final oýunlaryndan soň Serbiýa bilen Germaniýanyň ýygyndylary finalda duşuşarlar.
Serbiýanyň ýygyndysy ýarym finalda Bogdan Bogdanowiçiň 23 utuk geçiren oýnunda Kanadany 95:86 hasabynda ýeňdi. Kanadanyň NBA-nyň ýyldyzy RJ Barrettiň 23 utugy ýeňşe ýeterlik bolmady. Serbiýanyň ýygyndysy 10-njy gezek finalda oýnar. Olar mundan öňki Ýugoslawiýanyň döwründe 3, 1994-nji ýyldan soň 2 gezek, jemi 5 çempionlyk gazandylar.
Beýleki ýarym finalyň netijesi uly täzelik boldy. Çekeleşikli geçen oýunda Germaniýanyň ýygyndysy basketbolyň watany hasaplanýan ABŞ-nyň ýygyndysyny 113:111 hasabynda ýeňdi. 3-nji periodda has erjel oýun görkezen nemesler taryhynda ilkinji gezek finala çykmagy başardy. Esasy ýyldyzlaryny çempionata alyp gaýtmadyk amerikanlaryň 4-nji periodda tijenmegi olara ýeterlik bolmady. Germaniýadan Andreas Obst geçiren 24 utugy bilen toparynyň ýeňiş gazanmagyna uly goşant goşdy.
Final duşuşygy ýekşenbe güni, 10-njy sentýabrda 17:40-da başlanar.
