Ýewropanyň öňdebaryjy çempionatlarynda nobatdaky tapgyrda biri-birinden gyzykly duşuşyklar futbol muşdaklaryna garaşýar.
Öňümizdäki 3 günüň dowamynda oýnaljak täze tapgyryň duşuşyklarynda iň köp ünsi çekýän oýun “El Klasiko” duşuşygydyr. 28-nji oktýabrda oýnaljak “Barselona” – “Real Madrid” duşuşygy şenbe güni 19:15-de başlanar. Bu iki toparyň arasyndaky 255-nji resmi, umumylykda-da 297-nji “El Klasiko” bolar. Resmi oýunlara seredenimizde, “Real Madridiň” 102, “Barselonanyň” 100 ýeňşi bar (gollar 424 – 415). Umumylykda bolsa “Barselona” 124, “Real Madrid” 108 oýunda ýeňiş gazandy (gollar 519 – 479). Iki topar mundan öň “La Liganyň” çäginde 186 gezek duşuşyp, şolarda “Realyň” 77, “Barsanyň” 74 ýeňşi bar.
Şeýle-de, ýekşenbe gününde-de birnäçe duşuşygyň arasyndan 4 sanysy öňe saýlanýar. Angliýanyň “Premier Ligasynda” Mançester derbisinde “Ýunaýted” öz meýdançasynda “Sitini” kabul eder. Duşuşyk Aşgabat wagty bilen 20:30-da başlanar. Iki topar 191-nji gezek özara güýç synanyşarlar. Mundan öňki 190 oýunda “Ýunaýted” 78, “Siti” 59 oýunda ýeňiş gazandy.
Italiýanyň çempionaty “Serie A”-da hem tapgyrda 2 esasy duşuşyk oýnalar. Ilki sanawyň lideri “Inter” öz meýdançasynda “Roma” bilen duşuşsa, çempion “Napoli” öz meýdançasynda “Milan” bilen güýç synanyşar. Duşuşyklar Ýewropa yklymynyň gyş sagadyna geçmegi sebäpli ozalky wagtyndan 1 sagat giç başlanar.
Ýene bir duşuşyk hem Niderlandlaryň çempionatyndaky PSW bilen “Aýaksyň” arasyndaky oýun bolar. Sanawyň başyny çekýän PSW bilen 17-nji ýerde barýan “Aýaksyň” duşuşygy 18:30-da başlar.
