Gyrgyz Respublikasynyň parlamentiniň deputatlarynyň bir topary ýurduň baýdagynyň ortasynda ýerleşýän şekildäki Gün şöhlelerini göneltmek baradaky pikir bilen çykyş etdiler. Kanunyň taslamasy köpçüligiň ara alyp maslahatlaşmagyna hödürlendi, bu pikir eýýäm Prezident Sadyr Žaparow tarapyndan tassyklandy.
Gyrgyzystanyň häzirki baýdagynyň ortasynda ýerleşdirilen şekildäki tüýnügiň töwereginden Gün şöhleleri dürli tarapa ýaýraýar.
-Baýdagyň ortasyndaky dizaýnyň Gündügine garamazdan, ol köplenç günebakary ýada salýar – diýip Prezident Sadyr Žaparow belledi. Ol daşary ýurtly myhmanlaryň baýdakdaky şekili ýalňyşyp, ony günebakaryň şekili hökmünde kabul eden gezekleriniň az bolmandygyny mysal getirdi.
Täze baýdagyň dizaýnynda şöhleleriň sany üýtgewsiz galdyryldy – olar 40. Olar bir tegelekde birleşip, gadymy 40 gyrgyz taýpasynyň birleşmegini alamatlandyrýar.
