Saud Arabystanynyň Jidda şäherinde geçirilýän 20-nji FIFA Klublararasy Dünýä Kubogynyň finaly anna güni, 22-nji dekabrda geçiriler. Şa Abdullahyň adyny göterýän stadionda Aşgabat wagty bilen 23:00-da başlanjak finalda Braziliýanyň “Fluminense” topary bilen Angliýanyň “Mançester Siti” kluby duşuşar. Iki topar hem bu ýaryşa ilkinji gezek gatnaşýarlar.
“Fluminense” topary ýarym finalda Afrikanyň Çempionlar Ligasynyň ýeňijisi, Müsüriň “Al-Ahli” toparyndan 2-0 hasabynda üstün çykdy. Brazil klubuna ýeňiş getiren gollary Arias (71 p) hem-de Kennedi (90) derwezä girizdi.
“Mançester Siti” topary bolsa ýarym finalda AFK Çempionlar Ligasynyň kubogynyň eýesi, Ýaponiýanyň “Urawa Red Daýmonds” toparyny 3-0 hasabynda ýeňlişe sezewar etdi. Iňlis klubunyň doly artykmaçlygynda geçen oýunda “Mançester Sitiniň” adyndan Hoibraten (45+1, ö.d.), Kowaçiç (52) hem-de Bernardo Silwa (59) tapawutlandy.
Her yklymyň çempionlarynyň hem-de guraýjy ýurduň çempionynyň gatnaşýan FIFA Klublarasy Dünýä Kubogyna şu ýyl 7 klub wekilçilik edýär. 1-nji tapgyrda ýer eýesi, Saud Arabystanynyň “Al-Ittihad” topary Okeaniýanyň çempiony, Täze Zelandiýanyň “Oklend Siti” toparyny 3-0 (Romarinio 29, Kante 34, Benzema 40) hasabynda ýeňipdi. 2-nji tapgyrda “Al-Ittihad” Müsüriň “Al-Ahli” toparyndan 3-1 hasabynda asgyn geldi (Maalul 21 p, El-Şahat 59, Aşur 62 – Benzema 90+2). 2-nji tapgyrda ýapon kluby KONKAKAF-yň çempiony, Meksikanyň “Leon” toparyny Antonios Şalkyň 78-nji minutdaky ýeke-täk goly bilen 1-0 hasabynda utupdy.
