Indoneziýanyň paýtagtynyň töwereginde “Uly deňiz diwary” gurlar. “Bloomberg”-iň habar berşi ýaly, munuň netijesinde häkimiýetler Jakartany suw joşmalaryndan halas etmege bil baglaýarlar. Bu desga ýurduň demirgazyk kenarlarynda gurlup, umumy uzynlygy 24 kilometre barabar bolan 17 sany emeli adadan ybarat bolar.
Indoneziýanyň Ykdysady meseleler boýunça utgaşdyryjy ministri Airlangg Hartarto gurluşygyň 2040-njy ýyla çenli alnyp baryljakdygyny we üç basgançakda geçiriljekdigini habar berdi. Ýöne ýurduň Goranmak ministrligi gurluşygyň 40 ýyla çekjekdigini aýtdy. Ilkinji iki tapgyrda, takmynan, 10,5 milliard dollar gerek boljakdygy çaklanylýar.
Indoneziýada bu taslama barada 10 ýyldan gowrak wagt bäri pikir alşylýar. Şol bir wagtyň özünde, Jakarta suw joşmalaryň howpy abanýan megapolis hökmünde ykrar edildi. Şäher her ýyl 25 santimetr çökýär, daşgyn suwlary sebäpli suw joşmalary 200 santimetr ýokarlanýar. Ýollaryň suw basmagy eýýäm döwlet üçin gaty gymmat düşýär – tebigy hadysalar üçin hökümet her ýyl onlarça milliard dollar sarp edýär. Çaklamalara görä, ýakyn 10 ýylda suw joşmasy has-da artyp, 2050-nji ýyla çenli şäheriň üçden bir bölegi suw astynda galjakdygy çaklanylýar.
Deňiz diwaryndan başga-da, ýerasty suwlaryň çykarylmagyny çäklendirmäge ýardam bermek Jakartanyň suw joşmasyny haýallatmaga kömek edip biler. Mundan başga-da, Borneo jeňňelinde täze bir şäher gurulýar – Nusantara, häkimiýetleriň meýilnamalaşdyryşy ýaly gark bolup barýan şäheriň ornuny tutup biler.
