Soňky 3-4 ýyldan bäri her transfer döwründe, gyşda-da, tomusda-da fransiýaly Kilian Mbappeniň PSŽ-den “Real Madride” geçýändigi baradaky habarlaryň yzy üzülenok. Ýöne şu wagta çenli welin, kagyz ýüzündäki bu habarlar hakykat ýüzünde öz beýanyny tapmandy. Ine, ahyry Kilian Mbappeniň “Real Madridi” saýlandygy baradaky habarlar gelip başlady. “RMC Sport”-yň habar bermegine görä, Mbappe möwsümiň ahyrynda PSŽ-den gidýändiginden toparyň eýesi Nasser Al-Helaifini habarly edipdir. Şunlukda, 25 ýaşyndaky futbolçynyň tomusda “Real Madrid” bilen şertnama baglaşmagyna garaşylýar. Bu habaryň takykdygyny ispanlaryň “Marca” gazeti, şol sanda meşhur žurnalist, transferler ugry boýunça ussat hünärmen Fabrizio Romano hem tassyklaýar.
PSŽ Mbappeni 2017/18 möwsüminde Monakodan kärendesine alypdy. Bir möwsüm soňam 180 million ýewro berip, ymykly düzümine goşupdy.
Mbappe PSŽ-de 290 oýunda 243 gol geçirip, 105 goluň pasyny berdi.
