PDF
Global ykdysady we syýasy sammitleriň iň esasylarynyň biri hasanlanýan Bütindünýä Ykdysady Forumy gaýtadan Şweýsariýanyň Dawos şäherinde geçiriler.
Şu ýyl koronawirus pandemiýasy sebäpli Bütindünýä ykdysady forumy Şweýsariýada däl-de, Singapurda geçirilmeli edilipdi. 17-20-nji awgust aralygynda geçirilmeli halkara sammit pandemiýa bilen baglanyşykly ýagdaýlaryň global maslahaty guramaga mümkinçilik bermeýändigi sebäpli ýatyrylypdy. Indi bolsa bu halkara maslahatyň ýene-de Dawosda geçirilmeginde karar edildi.
WEF-ni esaslandyryjy we başlygy Klaus Şwab dünýäniň näbellilikden we dartgynlylykdan doludygyny, şonuň üçin dünýä liderleriniň arasynda gepleşikleriň möhümdigini aýtdy.
Şeýlelikde, Bütindünýä ykdysady forumynyň (WEF) 2022-nji ýylyň 17-21-nji ýanwary aralygynda Şweýsariýanyň Dawos şäherinde geçirilmegi göz öňünde tutulýar. Bu barada guramanyň web sahypasynda habar berilýär.
-Ýolbaşçylaryň bilelikde işlemek we ynamy dikeltmek we global hyzmatdaşlygy giňeltmek jogapkärçiligi bar – diýip, Şwab öz çykyşynda belledi.
Ýatlap geçsek, WEF-iň 2021-nji ýyldaky ýygnagynyň ilki 25-28-nji maýda Singapurda geçiriljekdigi mälim edilipdi. Soňra bolsa, koronawirusyň täze ştammlarynyň peýda bolmagy sebäpli 17-20-nji awgusta süýşürildi. Indi bolsa, bu maslahat hem ýatyrylyp, ozalky geçýän ýeri bolan Dawosda geçirilmegi makul bilindi.
Dawos Sammitine her ýyl 120 töweregi ýurtdan 3 müň işewür, syýasatçy, akademik we jemgyýetçilik guramalarynyň wekilleri gatnaşýar.
