CNN-iň esaslandyryjysy Ted Terner aradan çykdy

Dünýäniň habarlar ulgamynda düýpli öwrülişik eden meşhur işewür, CNN teleýaýlymynyň esaslandyryjysy Ted Terner çarşenbe güni 87 ýaşynda aradan çykdy. Bu barada CNN teleýaýlymy habar berdi. Telewideniýe pudagynyň ägirdi hasaplanýan Terner soňky ýyllarda Lewiniň demensiýasy diýlip atlandyrylýan nerwi ulgamynyň kesellemeginden ejir çekýärdi.
Ted Terner 1980-nji ýylda dünýäde ilkinji bolup 24 sagatlap yzygiderli habar berýän “Cable News Network” (CNN) toruny döretmek bilen, nusgawy teleradiogepleşikleriň taryhynda täze sahypa açdy. Teleýaýlym aýratyn-da 1990-1991-nji ýyllarda ählumumy ykrarnama eýe boldy.
Işewürlik imperiýasyny diňe bir habarlar bilen çäklendirmän, “Terner” TBS, TNT, “Turner Classic Movies” we “Cartoon Network” ýaly sport hem-de güýmenje ýaýlymlaryny hem esaslandyrdy. Ol telekeçilikden başga-da, parusly gaýyk sportunyň muşdagy, “Amerikanyň kubogynyň” eýesi we ynsanperwerlik kömegini berýän iri filantrop hökmünde tanalýardy. Terner BMG-niň haýyr-sahawat gaznalaryna 1 milliard dollar möçberinde serişde goýup, jemgyýetçilik işlerine işjeň gatnaşdy.
“CNN Worldwide” kompaniýasynyň başlygy we baş direktory Mark Tompsonyň belleýşi ýaly, ol diňe bir teleýaýlymy esaslandyryjy däl, eýsem, CNN-iň gymmatlyklaryny we ýörelgelerini kemala getiren şahsyýet hökmünde taryha girer.