PDF
16-njy iýunda Özbegistan Respublikasynyň paýtagty Daşkent şäherinde bäşinji Daşkent halkara maýa goýum forumy (TIIF) öz işine başlady. Halkara maliýe institutlarynyň wekilleriniň, daşary ýurtly maýadarlaryň we iri kompaniýalaryň ýolbaşçylarynyň gatnaşmagynda geçirilýän bu giň gerimli çäre sebitde ykdysady diplomatiýanyň möhüm meýdançasyna öwrüldi. Foruma gatnaşyjylar maýa goýum taslamalaryny, düzümleýin özgertmeleri we halkara hyzmatdaşlygy ösdürmegiň strategik ugurlaryny ara alyp maslahatlaşýarlar.
Çäräniň çäklerinde Özbegistan Respublikasynyň Prezidenti Şawkat Mirziýoýew foruma gelen ýokary derejeli myhmanlar we işewürler bilen ikitaraplaýyn duşuşyklaryň birnäçesini geçirdi. Hususan-da, Özbegistanyň we Albaniýanyň Prezidentleriniň arasynda geçirilen ilkinji sammitde söwda, maýa goýum, «ýaşyl» energetika we logistika ulgamlarynda hyzmatdaşlygy giňeltmek barada ylalaşyk gazanyldy. Şunda Albaniýanyň Durres portunyň özbek harytlarynyň Günorta Ýewropa bazarlaryna çykarylmagynda möhüm logistik merkez hökmünde ulanylmagyna aýratyn üns berildi. Mundan başga-da, foruma Germaniýanyň Federal Prezidenti Frank-Walter Ştaýnmaýeriň resmi sapar bilen gelmegine we durnukly ykdysady ösüş, ulag-logistika ulgamlary boýunça gepleşikleriň geçirilmegine garaşylýar.
Forumyň çäklerinde guralan amerikan-özbek işewürlik maslahaty halkara maýadarlaryň sebitiň ykdysady mümkinçiliklerine bolan gyzyklanmasynyň barha artýandygyny görkezdi. Bu ugurda dünýäniň öňdebaryjy kompaniýalarynyň, şol sanda «Boeing», «Visa», «JP Morgan», «Meta» ýaly iri düzümleriň ýolbaşçylary bilen strategik çig mal, emeli aň, sanly tehnologiýalar we energetika pudagynda täze maýa goýum taslamalary ara alnyp maslahatlaşyldy hem-de degişli ylalaşyklar gazanyldy.
Duşuşyklarda öňe sürlen esasy ugurlaryň biri hem emeli aň ulgamy üçin zerur bolan sanly düzümleri we maglumatlary saklaýan merkezleri gaýtadan dikeldilýän energiýa çeşmeleri bilen üpjün etmek meselesi boldy. Maýadarlar tarapyndan durnukly maýa akymyny çekmekde syýasy durnuklylygyň, hukuk kepillikleriniň we aýdyň syýasatyň ähmiýeti nygtaldy. Şeýle-de forumda halkara ekologik, durmuş we korporatiw dolandyryş (ESG) standartlaryny ornaşdyrmak, ykdysadyýetde zenanlar telekeçiligini goldamak hem-de şäherleriň maýa goýum bäsdeşligini ýokarlandyrmak ýaly häzirki zaman ykdysady ýörelgeleriň wajyplygyna seredildi.
