Hytaýyň «Tiangong» kosmos bekediniň hünärmenleri kosmosda ösümlikleri ösdürip ýetişdirdiler. «Shenzhou 16» kosmos gämisi bilen şu ýylyň 30-njy maýynda uçurylan üç kosmonawt 31-nji oktýabrda yzyna dolanyp geldi. 27-nji oktýabrda olaryň ýerine baran «Shenzhou 17» gämisiniň ekipažy beketde ýetişdirilen miwe we gök önümleri bilen tanyşdyryldy. Kosmonawtlar iýun aýynda işdäaçar ýapragyny ekip, dört gezek hasyl alypdyrlar. Awgustda çereşnýa, gök sogan we pomidor ekipdirler. Hytaýyň kosmonawt barlag we okuw merkezinde bolsa, deňeşdirmek üçin edil kosmos bekedindäki ýaly şertlerde şol ekinler ekilipdir. Ekin ýörite taýýarlanan enjamyň içinde ekilýär. Bu enjamyň içindäki ösümlikler howadaky kömürturşy gazyny özüne siňdirip, kislorod öndürip bilýär. Bu taslama uzak möhletli kosmos maksatnamalaryny durmuşa geçirmekde peýdaly bolar diýen niýet bilen ýerine ýetirilýär.
Hytaýyň kosmonawt barlag we okuw merkeziniň hünärmeni Ýan Renze geljekde çalt we has köp hasyl berýän gök önüm ýetişdirmegi maksat edinýändiklerini aýdýar.
Süleýman MERETGELDIÝEW,
Türkmen döwlet binagärlik-gurluşyk institutynyň talyby.
PDF









