PDF
31-nji maýda Kolumbiýada geçirilen Prezident saýlawlarynyň birinji tapgyrynyň resmi netijeleri mälim edildi. Ýurduň Saýlaw reýestriniň berýän maglumatlaryna görä, «Watan goragçylary» hereketiniň dalaşgäri Abelardo de la Espriella sesleriň 43,7 göterimini, «Taryhy pakt» koalisiýasynyň dalaşgäri Iwan Sepeda bolsa 40,9 göterimini almagy başardy. Şeýlelikde, dalaşgärleriň bellenen mukdarda ses alyp bilmezligi sebäpli, saýlawlaryň ikinji tapgyry 21-nji iýuna bellendi.
Bu gezekki saýlawlar raýatlaryň ýokary işjeňligi bilen tapawutlandy. Ses bermäge hukukly ilatyň 57,88 göterimi saýlaw uçastoklaryna gelip, öz syýasy erkini bildirdi. Birinji tapgyrda «Demokratik merkez» partiýasynyň wekili Paloma Walensiýa 6,92 göterim, sentrist dalaşgärler Serhio Fahardo 4,26 göterim we Klaudiýa Lopes 0,95 göterim ses aldy. Häzirki wagtda taraplar öňde duran ikinji tapgyra taýýarlyk görýärler we saýlawçylaryň goldawyny gazanmak ugrunda degişli çäreleri amala aşyrýarlar.
Dalaşgärleriň maksatnamalarynda ýurduň geljekki ösüş ugurlaryna we durmuş-ykdysady meselelere aýratyn orun berilýär. Taslamalarda durmuş maksatnamalaryny has-da kämilleşdirmek, parahatçylykly gepleşikleri dowam etdirmek, döwletiň ykdysadyýetdäki ornyny kadalaşdyrmak ýaly möhüm wezipeler göz öňünde tutulýar.
Munuň bilen birlikde, saýlaw çäreleri ýurtda sporty, aýratyn-da futboly ösdürmek ugrunda alnyp barylýan işleriň işjeňleşen döwrüne gabat geldi. Ýakyn günlerde geçiriljek dünýä çempionatynyň öňüsyrasynda, milli ýygyndynyň sport lybaslary we nyşanlary ilat arasynda giň meşhurlyga eýe bolýar. Hünärmenleriň bellemeklerine görä, bu şatlykly wakalar ilat arasynda sagdyn durmuş ýörelgesini we sporta bolan höwesi has-da ilerletmäge ýardam edýär. Kolumbiýanyň milli ýygyndysy çempionatdaky ilkinji duşuşygyny 17-nji iýunda Özbegistanyň toparyna garşy geçirer.
