Golaýda “Zaha Hadid Architects” (ZHA) binagärlik edarasy Italiýanyň Neapol şäheriniň gündogar künjünde gurmak üçin jübüt binanyň taslamasyny hödürledi. Mäkäm gurluşyk materiallaryndan gurulmaly desgalaryň görnüşi şäherden 10 kilometr uzaklykdakly Wezuwiý dagyndan ylham alnypdyr.
Bu taslama “Napoli Porta Est” taslamasynyň çäginde 30 gektar taşlanan senagat meýdanyny janlandyrmak boýunça bäsleşikde ýeňiji boldy. Bu desgalar ýyladyşhanalaryň we dükanlaryň ýerleşdiriljek uzyn stilobatyndan ýokarlygyna uzap gider. Olaryň degre-daşynda seýilgäh peýda bolar. Bu toplumda Kampaniýa sebitiniň administrasiýasy ýerleşer we energiýa sarp edilişi bölekleýin Gün panelleri we geotermik energiýa arkaly üpjün ediler.
Binalaryň üçegine gök agaçlar oturdylar we ösümlikleri suwarmak üçin galyndy suwlar ulanylar. “Fasadyň dizaýny günüň dowamynda Günüň hereketini göz öňünde tutýar: tebigy ýagtylygyň binanyň içine düşmegi we görnüşini gowulandyrmagy üçin demirgazyk tarapdaky aýna jaýlaryň aňrybaş giň açylandygyny, şol bir wagtyň özünde energiýa sarp edilişini azaltmak üçin binanyň beýleki tarapdaky fasadlarynyň penjirelerine göni Gün şöhlesiniň düşüşişi iň pes derejä çenli kemeldilendigi” aýdylýar.
Gurluşygyň başlanmaly we gutarmaly senesi entek mälim edilmedi. Ýöne toplumyň gurluşygy tamamlansa, onuň Neapolyň binagärlik gymmatlyklarynyň birine öwrülip biljekdigi şübhesizdir.

Gyzykly bolup bilerЕЩЕ ОТ АВТОРА