26-njy awgustda Nepalyň serhetýaka sebitinde bolup geçen weýrançylykly suw joşmalary hem-de ýer süýşgünleri sebäpli ýüzlerçe adam heläk boldy, müňlerçe adam dereksiz ýitdi we uly möçberde infrastruktura zeper ýetdi. Iň köp zyýan çeken Rasuwa sebitindäki Trişuli derýasy öz hanasyndan agyp, binalary harabaçylyga öwürdi we ýollary ýumurdy.

Nepalyň Tebigy betbagtçylyklaryň howplaryny azaltmak boýunça Milli müdirligiň beren maglumatlaryna görä, 30-njy awgustda çenli betbagtçylyk çeken sebitlerden 734 adamyň jesedi tapyldy, ýene-de 2 müň 498 adam dereksiz ýitenleriň sanawynda galýar. Trişuli derýasyndaky suwuň derejesi gysga wagtda onlarça metr ýokarlanyp, tutuş ýaşaýyş etraplaryny syryp-süpürip äkitdi, ýurtdaky pajyganyň gerimi bolsa soňky onlarça ýylyň dowamynda görlüp-eşidilmedik derejä ýetdi.

Hytaý-Nepal serhet geçelgesinden, takmynan, 50 kilometr uzaklykda ýerleşýän Rasuwa sebitindäki kiçijik şäherçe agyr zeper çekip, poçta bölümi doly ýykyldy we birnäçe awtoulag lokura batyp galdy. Şäherçäni serhet geçelgesi bilen birleşdirýän, Nepal bilen Hytaýyň arasyndaky möhüm söwda ugry bolan hem-de halas edijiler üçin zerur bolan ýol doly hatardan çykdy, häzirki wagtda alnyp barylýan abatlaýyş işleriniň netijesinde ýoluň 150 metrlik bölegi ulaglaryň gatnawy üçin açyldy.

Dowam edýän süýşgünler we durnuksyz howa şertleri halas ediş işlerini has-da çylşyrymlaşdyrýar, iň köp zyýan çeken sebitlere ýetmek henizem aňsat däl, bu ýol daşarky dünýäden üzňeleşen obalara ynsanperwer kömegini ýetirmegiň ýeke-täk ýolydy. Halkara jemgyýetçiligi gynanç bildirip, kömek bermäge taýýardygyny mälim edýär, bu betbagtçylyk bolsa tebigy hadysalara sezewar bolýan daglyk sebitlerde irki duýduryş ulgamlaryny kämilleşdirmegiň zerurdygyny ýene bir gezek öňe çykarýar.

Gyzykly bolup bilerЕЩЕ ОТ АВТОРА