Polşada resmi taýdan 18-nji maýda geçiriljek Prezident saýlawlaryna taýýarlyk işleri başlandy. Bäsleşige 11 dalaşgär gatnaşyp, olar saýlawlardan öňki kampaniýada raýat hyzmatdaşlygy, kanunyň hökmürowanlygy we howpsuzlyk ýaly jemgyýet üçin möhüm meselelere ünsi jemleýärler.
Pikir soralyşyklara görä, häzirki wagtda Warşawanyň häkimi Rafal Tşaskowskiý saýlawçylar tarapyndan makullanýan dalaşgärleriň biridir. Ol häzirki dolandyryjy koalisiýanyň öňdebaryjy partiýasy bolan “Raýat platformasyna” wekilçilik edýär. Bu Tşaskowskiý üçin ilkinji Prezidentlik bäsleşigi däl. Ol 2020-nji ýylda “Hukuk we adalat” partiýasynyň dalaşgäri Anjeý Duda bilen bilelikde saýlawlaryň ikinji tapgyryna çykdy we az ses bilen Dudadan ýeňildi.
Şäher häkiminiň esasy bäsdeşi Polşanyň Milli ýatlama institutynyň başlygy Karol Nawroskiý. Ol garaşsyz dalaşgär hökmünde saýlawlara gatnaşyp, “Kanun we adalat” partiýasynyň goldawyny alýar.
Ýatlanyp geçilen dalaşgärlerden başga-da, häzirki wagtda Seýmiň başlygy Şimon Holownýa, ýewroskeptikleriň “Konfederasiýa” koalisiýasynyň wekili Sławomir Mentsen we “Erkin respublikanlar” partiýasyndan parlamentiň wekili Marek Ýakubýak dalaşgärlik ederler.
Şu ýyl Polşanyň häzirki Prezidenti Anjeý Dudanyň ikinji möhletiniň tamamlanýar we kanun boýunça gaýtadan dalaşgärlik edip bilmeýär. Polşada döwlet Baştutany syýasy ugry kesgitlemekde onçakly möhüm rol oýnamaýar. Ýöne parlamentiň kanun taslamalaryna we hökümet başlangyçlaryna weto goýmaga haklydyr. Maglumatlara görä, şu günki güne çenli saýlawçylaryň 67 göterimi 18-nji maýda geçiriljek saýlawlara gatnaşmagy meýilleşdirýär.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА