PDF
Ispaniýanyň Şa Kubogynda 1/16 finalyň duşuşyklary geçirilip, 1/8 finala çykanlar belli bolupdy. 1/8 finalyň bijeleri çekilip, “Real Madrid” “Selta” bilen, “Barselona” “Betis” bilen bije çekişdi. Kubogyň eýesi “Atletik” bu derejesini saklamak üçin ilki “Osasunany” ýeňmeli bolar. 1/8 finalyň duşuşyklary 14-16-njy ýanwarda oýnalar.
Mälim bolşy ýaly, 1/16 finalda kubogyň häzirki eýesi “Atletik Bilbao” toparyna ýaryşy dowam etmek ýeňil düşmedi. Myhmançylykda 4-nji liganyň wekili “UD Logronýesi” golsuz tamamlanan duşuşygyň ahyrynda penalti urgulary esasynda 4-3 hasap bilen ýeňmegi başardy.
“Barselona” topary myhmançylykda 4-nji ligadan gatnaşýan “Barbastronyň” derwezesinden jogapsyz 4 gol geçirdi. Katalonlaryň gollaryny Garsiýa (21), Lewandowski (31, 47) hem-de Torre (56) derwezä girizdi.
“Real Madrid” topary bolsa 4-nji liganyň başga bir wekili bilen, “Deportiwo Minera” bilen duşuşypdy. Myhmanlaryň doly artykmaçlygynda geçen oýunda Madridden baran futbolçylar 5-0 hasabynda ýeňiş gazandy. Ýer eýeleriniň derwezeçisiniň erjellik görkezen duşuşygyndaky gollary Walwerde (5), Kamawinga (13), Arda Güler (28, 88) hem-de Luka Modriç (55) geçirdi. 39 ýaşyndaky Modriç Ispaniýanyň Şa Kubogy ýaryşynda ilkinji gezek tapawutlanmagy başardy.
“Atletiko Madrid” myhmançylykda 3-nji liganyň kluby “Marbelýa” toparyny Antuan Grizmannyň (16) ýeke-täk goly bilen ýeňip, adyny 1/8 finala ýazdyrdy.
Geçen möwsümiň finalçysy “Malýorka” topary myhmançylykda 4-nji liganyň kluby “Pontewedradan” 4-0 hasabynda utulyp, ýaryşdan çykdy. “Sewilýa” hem “Almeriýadan” 4-1 hasabynda asgyn geldi. “La Liganyň” wekili “Walýadolid” myhmançylykda 3-nji liganyň topary “Ourenseden” 3-2 hasabynda utuldy we ýaryş bilen hoşlaşdy.
1/8 finalyň duşuşyklary:
“Pontewedra” – “Hetafe”, “Ourense” – “Walensiýa”, “Almeriýa” – “Leganes”, “Elçe” – “Atletiko Madrid”, “Real Madrid” – “Selta”, “Barselona” – “Betis”, “Real Sosiedad” – “Raýo Wallekano”, “Atletik Bilbao” – “Osasuna”.
