PDF
UEFA Çempionlar Ligasynda pleý-off tapgyrynyň 1-nji duşuşyklary geçirildi. Oýnalan 7 oýnuň 4-si deňlikde tamamlandy. 2 duşuşykda ýer eýeleri, 1 oýunda-da myhmançylykdaky topar ýeňiş gazanmagy başardy.
Tapgyryň iň uly hasaply ýeňşi Şotlandiýada bellige alyndy. “Seltik” öz meýdançasynda Awstriýanyň çempiony LASK toparyndan Erik Nigreniň hem-de Kamilo Duranyň gollary esasynda 3-0 hasabynda üstün çykdy.
Norwegiýanyň wise-çempiony “Bude-Glimt” myhmançylykda Niderlandlaryň “NEK Niýmegen” toparyny 3-1 hasabynda ýeňip, final tapgyryna gatnaşmaga golaýlaşdy. Duşuşykda myhmanlaryň gollaryny Brunstad Fet (25), Helmersen (44 p) hem-de Aleesami (50) geçirdi. Ysraýylyň çempiony “Hapoel Be’er Şewa” Wengriýada Azerbaýjanyň çempiony “Sabah” toparyny 2-1 hasabynda ýeňdi (Ist 43, Zlatanowiç 79 – Simiç 6).
“Fenerbahçe” bilen “Lion” Stambulda duşuşyp, oýun 1-1 hasabynda deňlikde tamamlandy. Gollary iki toparyň hem täze transferleri geçirip, ilki “Lionyň” ýyldyzy Loi Openda 40-njy minutda hasaba açsa, 47-nji minutda tapawutlanan Meýson Grinwud hasaby deňledi.
Slowakiýa bilen Sloweniýanyň çempionlarynyň arasyndaky oýun hem 1-1 hasabynda deňlikde tamamlandy. “Slowan Bratislawadan” Çerepkainiň 15-nji minutdaky goluna “Selýeden” Awdili 41-nji minutda jogap berdi.
“Dinamo Zagreb” bilen Norwegiýanyň çempiony “Wikingiň” arasynda oýunda-da ýeňiş gazanan bolmady. Ýer eýeleri horwatlar ilkinji 10 minutda Belýo (6) hem-de Lisikanyň (10) gollary esasynda 2-0 hasabynda öňe saýlandy. Ýöne myhmanlar 1-nji ýarym tamamlanmanka, Kristianseniň (26) hem-de Tripiçiň (39) gollary bilen hasaby deňlemegi başardy.
Bolgariýada paýtagt Sofiýanyň “Lewski” topary bilen Gresiýanyň paýtagty Afinynyň AEK toparynyň arasyndaky oýunda bolsa hasap açylmady.
Jogap oýunlary 25-26-njy awgustda oýnalar. 27-nji awgustda bolsa Çempionlar Ligasynyň liga tapgyrynda haýsy toparlaryň haýsy toparlar bilen duşuşyk geçirjekdiginiň bijeleri çekiler.
Lewski Sofiýa – AEK Afiny: 0-0
Seltik – LASK: 3-0
Dinamo Zagreb – Wiking: 2-2
Slowan Bratislawa – Selýe: 1-1
Hapoel Be’er Şewa – Sabah: 2-1
Fenerbahçe – Lion: 1-1
NEK Niýmegen – Bude-Glimt: 1-3
