“Serie A”-nyň 94-nji möwsümi başlanýar

Italiýanyň çempionaty “Serie A”-nyň täze 94-nji, umumylykda italýan ýokary ligasynyň 124-nji möwsümine ertir badalga berler. 20 klubuň çykyş edýän çempionatynda “Napoli”, “Inter”, “Ýuwentus”, “Roma”, “Milan”, “Lasio” klublary çempionlygyň esasy dalaşgärleri diýlip görkezilýär.

Çempionatda Lombardi sebitinden 5 topar – “Milan”, “Inter”, “Atalanta”, “Komo”, “Kremoneze” klublary, Emilia-Romanodan 3 topar – “Bolonýa”, “Parma”, “Sassuolo” klublary wekilçilik eder. Milan, Rim, Turin şäherleriniň hersinden 2 klub çykyş edip, şol şäherleriň klublarynyň özara duşuşygy çempionatyň esasy derbileri hasaplanýar.

2025/26 möwsüminde çykyş etjek 20 klubuň 12-si şu tomusda tälimçilerini çalyşdylar. Başgaça aýdylanda, diňe 8 klub geçen möwsümdäki tälimçileri bilen ýoluny dowam edýär. “Milandyr” “Lasio”, “Fiorentina” ýaly klublar öňki tälimçilerine wezipe belledi. Aglaba ýerli hünärmenleriň agdyklyk edýän çempionatyndaky 20 klubuň 7-sine legionerler tälim berip, olaryň arasynda Horwatiýadyr Ispaniýadan 2, Rumyniýadan, Fransiýadan hem-de Germaniýadan 1 tälimçi bar. Şeýle-de, klublaryň 6-sy amerikaly işewürleriň ýa-da uly şereketleriň eýeçiligindedir.

“Empoli” 4, “Monza” 3, “Wenesiýa” 1 ýyldan soň aşaky liga düşdi. Olaryň ornuna “Serie B”-den “Sassuolo”, “Piza” hem-de “Kremoneze” toparlary ýokary liga çykdylar. Esasanam “Piza” toparynyň 34 ýyldan soň “Serie A” dolanmagy aýratyn bellärliklidir.

NAPOLI. Tälimçisi Antonio Konteni klubda saklan neapollylaryň düzüminden Raspadori gitdi. De Bruýne, Noa Lang, Sam Beukema ýaly oýunçylary transfer eden topar, esasan hem, “Serie A”-da 3 dürli kluba çempionlyk gazandyran ýeke-täk tälimçi Konte, şol sanda, Politano, MakTomineý, Anguissa ýaly oýunçylaryna bil baglaýar. Ýyldyz oýunçy Lukakunyň şikesi sebäpli geljek ýyla çenli topara kömegi degmez.

INTER. Geçen möwsümde ähli ýaryşlarda gazanyp biljek çempionlyklaryny soňky pursatlarda ýa-da finalda elden gideren “Interiň” iň esasy ýitgisi tälimçi Simone Inzagi bolar. 6 aýlyk tejribesi bolan Kiwuny tälimçilige bellän “Inter” transfer möwsümini işjeň bolmadyk ýagdaýda geçirýär.

ÝUWENTUS. 5 möwsümden bäri çempionlyk gazanyp bilmän gelýän “Ýuwentus” tälimçisi Igor Tudor bilen ýoluny dowam eder. Jonatan Dewid bilen Žoao Mariony transfer eden “Ýuwentusdan” Timoti Wea başga kluba geçdi.

ROMA. Geçen möwsümiň 2-nji ýarymyny Ranieriniň tälimçiliginde ýokary derejede tamamlan paýtagtyň adybir klubunda tälimçilik Jan Piero Gasperininiň gerdenine mündürildi. “Atalanta” toparyndaky 9 ýyllyk tälimçiliginde bergamolylara taryhy ýeňişler, hatda Ýewropa Ligasynyň çempionlygyny gazandyran Gasperininiň paýtagtlylardaky başdan geçirmesiniň nähili dowam etjekdigi klubuň janköýerlerini içgin gyzyklandyrýar. Belki-de Gasperininiň paýtagtlylara çärýek asyrdan soň çempionlyk kubogyny gazandyrmagy hem mümkin.

MILAN. Geçen möwsümi portugaliýaly tälimçileriň ýolbaşçylygynda (ýanwara çenli Fonseka, ýanwardan soň Konseýsau) şowsuz tamamlan “Milan” ozalky tälimçisini, kluba 2011-nji ýylda 18-nji çempionlygyny gazandyran Massimiliano Allegrini wezipä belledi. Transfer möwsüminiň ugradan hem-de alan oýunçylary bilen iň işjeň klublarynyň biri bolan “Milandan” iň esasy ýyldyzy Teýani Reýnders, şol sanda, Teo Hernandes, Malik Tşau, Emerson ýaly oýunçylar başga klublara geçdi. Modriç, Riççi, Estupinýan, Jaşari, De Winter ýaly oýunçylary-da alan “Milanyň” iň uly ýyldyzy Rafael Leao, şeýle-de Kristian Pulişiç bolar.

BEÝLEKILER. Maurisio Sarrini tälimçilige bellän “Lasio”, şol sanda Stefano Piolini täzeden toparyň tälimçiligine goýan “Fiorentina” topary-da öňdäki orunlar ugrunda göreş alyp barjak beýleki klublar bolar. Gasperininiň deregine Iwan Ýuriçi tälimçi eden “Atalanta” toparynda bir döwür tamam bolup, olaryň täze başdan geçirmesiniň nähili başlajakdygy janköýerlerde uly gyzyklanma döredýär.

I TAPGYRYŇ DUŞUŞYKLARY

23-nji awgust (şenbe)

Jenoa – Leççe (21:30)

Sassuolo – Napoli (21:30)

Milan – Kremoneze (23:45)

Roma – Bolonýa (23:45)

24-nji awgust (ýekşenbe)

Kaliari – Fiorentina (21:30)

Komo – Lasio (21:30)

Atalanta – Piza (23:45)

Ýuwentus – Parma (23:45)

25-nji awgust (duşenbe)

Udineze – Werona (21:30)

Inter – Torino (23:45)

KLUBLAR

ŞÄHERI

STADIONY-TOMAŞAÇY

TÄLIMÇI

Atalanta

Bergamo

Stadio Atleti Azzurri d'Italia - 24 950

Iwan Ýuriç (Horwatiýa)

Bolonýa

Bolonýa

Stadio Renato Dall'Ara - 38 279

Winçenzon Italiano

Kaliari

Kaliari

Unipol Domus - 16 416

Fabio Pisakane

Komo

Komo

Stadio Giuseppe Sinigaglia - 13 602

Sesk Fabregas (Ispaniýa)

Kremoneze

Kremona

Stadio Giovanni Zini - 20 641

Dawide Nikola

Fiorentina

Florensiýa

Stadio Artemio Franchi - 43 118

Stefano Pioli

Jenoa

Genue

Stadio Luigi Ferraris - 33 205

Patrik Wieira (Fransiýa)

Werona

Werona

Stadio Marcantonio Bentegodi - 31 713

Paolo Zanetti

Inter

Milan

San Siro - 75 710

Kristian Kiwu (Rumyniýa)

Ýuwentus

Turin

Juventus Stadium - 41 507

Igor Tudor (Horwatiýa)

Lasio

Rim

Stadio Olimpico - 67 585

Maurisio Sarri

Leççe

Leççe

Stadio Via del mare - 30 354

Eusebio Di Françesko

Milan

Milan

San Siro - 75 710

Massimiliano Allegri

Napoli

Neapol

Stadio Diego Armando Maradona - 54 732

Antonio Konte

Parma

Parma

Stadio Ennio Tardini - 22 352

Karlos Kuesta (Ispaniýa)

Piza

Piza

Arena Garibaldi – Stadio Romeo Anconetani - 12 508

Alberto Jilardino

Roma

Rim

Stadio Olimpico - 67 585

Jan Piero Gasperini

Sassuolo

Sassuolo

Mapei Stadium – Città del Tricolore - 21 515

Fabio Grosso

Torino

Turin

Stadio Olimpico Grande Torino - 28 177

Marko Baroni

Udineze

Udine

Stadio Friuli - 25 132

Kosta Runýaiç (Germaniýa)