Amazon jülgesinde tokaýlaryň çapylmagy 2023-nji ýylyň ahyryna çenli 50% azaldy. Bu barada Braziliýanyň Daşky gurşaw we howanyň üýtgemegi boýunça ministrligi habar berdi. “Tokaýlaryň çapylmagynyň azalmagy ýurduň Pariž şertnamasyna ygrarlydygyny we howanyň üýtgemegine garşy göreşde ýurduň öňdebaryjy ornuny tassyklaýar” diýlip, ministrligiň beýanatynda bellenilýär. Geçen ýylyň ýanwar-noýabr aýlary aralygynda tokaýlaryň çapylmagynyň 50,5% azalmagy Prezident Luis Inasiu Lula da Silwanyň ýolbaşçylygyndaky hökümet we edaralar tarapyndan kabul edilen çäreleriň netijesidir diýip ministrlikde bellediler.
Mundan başga-da, tokaýlaryň çapylmagynyň depgininiň azalmagynyň 250 million tonna kömürturşy gazynyň atmosfera goýberilmeginiň öňüni alandygy bellenildi. Braziliýanyň häkimiýetleri Braziliýada howa goýberilýän zyýanly gazlaryň ýarysynyň tokaýlaryň ýok edilmegi sebäpli emele gelýändigini aýdýarlar. Lula da Silwa öz gezeginde 2030-njy ýyla çenli tokaýlaryň ýok edilmeginiň doly öňüni almaga söz berdi.
Braziliýanyň öňki Prezidenti Žair Bolsonaronyň döwründe Amazon jülgesinde tokaýlaryň çapylmagy rekord derejä ýetipdi. Hususan-da, 2022-nji ýyla çenli tokaýlaryň çapylmagy taryhy derejä ýetdi. Diňe 2022-nji ýylyň ilkinji alty aýynda tokaýlaryň azalmagy 3 980 inedördül kilometre ýetdi. 2023-nji ýylyň ýanwar aýynda işe başlan Lula, geçen ýyl 277 müň gektar goralýan çäkleri döredip, ýetirilen zyýanyň öwezini dolmak üçin dürli çäreleri gördi.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА