PDF
Diňe bir Ýewropada däl, eýsem, tutuş dünýäde-de klub futbolynyň iň esasy bäsleşigi hasaplanýan UEFA Çempionlar Ligasy ýaryşy 70 möwsümi yzda galdyrdy. 70-nji möwsümde Fransiýanyň PSŽ topary finalda “Interi” final duşuşyklarynyň iň uly aratapawutly ýeňşi bilen ýeňip, taryhynda ilkinji gezek çempionlyk gazandy. Täze möwsüme, has takygy, 71-nji möwsümiň saýlama tapgyryna 8-nji iýulda badalga berildi.
1-nji saýlama tapgyryň 1-nji duşuşyklarynyň 10-sy geçirilip, Gazagystanyň “Kairat” topary myhmançylykda Sloweniýanyň “Olimpiýa Lýublýana” topary bilen 1-1 hasabynda deňme-deň oýnady (Pinto 66 – Satpaýew 59). Tapgyryň öňe saýlanan klublaryndan Şwesiýanyň “Malmö” topary myhmançylykda Gruziýanyň “Iberiýa 1999” toparyndan 3-1 hasabynda üstün çykyp, 2-nji saýlama tapgyryň bosagasyndan ilkinji ädmini ätdi.
Ermenistanyň çempiony “Noa” topary-da öz meýdançasynda “Buduknost Podgorisa” (Garadag) toparyny Ulad Omaryň 68-nji minutdaky ýeke-täk goly bilen 1-0 hasabynda ýeňdi.
5 goluň geçirilen oýnunda Gibraltaryň çempiony “Linkoln Red Imps” topary myhmançylykda Farer adalarynyň “Wikingur” 3-2 hasabynda ýeňlişe sezewar etdi.
1-nji saýlama tapgyrynyň duşuşyklary:
KuPS (Finlýandiýa) – Milsami Orhei (Moldowa): 1-0
Nýu Seýnts (Uels) – Şkendiýa (D. Makedoniýa): 0-0
Iberiýa 1999 (Gruziýa) – Malmö (Şwesiýa): 1-3
Lewadiýa (Estoniýa) – RFS (Latwiýa): 0-1
Drita (Kosowo) – Differdanž 03 (Lýuksemburg): 1-0
Wikingur (Farer adalary) – Linkoln Red Imps (Gibraltar): 2-3
Egnatiýa (Albaniýa) – Breidablik (Islandiýa): 1-0
Wirtus (San Marino) – Zrýinski Mostar (Bosniýa we Gersegowina): 0-2
Olimpiýa Lýublýana (Sloweniýa) – Kairat (Gazagystan): 1-1
Noa (Ermenistan) – Buduknost Podgorisa (Garadag): 1-1
Şu gije oýnaljak duşuşyklar
Şelburn (Irlandiýa) – Linfild (D. Irlandiýa)
Žalgiris (Latwiýa) – Hamrun Spartan (Malta)
FKSB (Rumyniýa) – Inter Klub d’Eskaldes (Andorra)
Ludogores Razgrad (Bolgariýa) – Dinamo Minsk (Belarus)
36 klubuň 29-sy belli
Jemi 36 klubuň gatnaşýan ýaryşy bassyr 2-nji gezek liga görnüşde geçiriler. 36 klubuň 29-sy belli bolup, olar şol toparlaryň geçen möwsümde görkezen netijeleri esasynda kesgitlenilýär. Galan 7 topar üçin 53 klub 4 tapgyrdan ybarat bolan saýlama oýunlaryny oýnarlar.
29 klubuň 6-sy Angliýadan bolup, ýaryşyň taryhynda bir ýurtdan ilkinji gezek 6 topar wekilçilik eder. Şol 6 toparyň 3-si London şäheriniň klublarydyr. Şeýle-de, 29 klubuň arasynda Belgiýanyň çempiony “Ýunion “Sent-Žilluaz” topary taryhynda ilkinji gezek bu ýaryşda çykyş eder.
Häzirki wagtda 1-2-nji saýlama tapgyrynyň bijeleri belli bolup, 2 tapgyryň hem duşuşyklary şu aýyň dowamynda tamamlanar. 3-nji saýlama tapgyrynyň bijeleri 21-nji iýulda çekise, duşuşyklar 5-6-njy hem-de 12-nji awgustda oýnalar. 4-nji awgustda pleý-off tapgyrynyň bijeleri belli bolup, duşuşyklar 19-20-nji hem-de 26-27-nji awgustda geçiriler. Liga tapgyrynyň bijeleri, has takygy, haýsy klublaryň haýsy klublar bilen duşuşyk geçirjekdigi 28-nji awgustda guraljak bije çekiliş dabarasynda mälim ediler. Liga tapgyrynyň duşuşyklaryna-da 16-njy sentýabrda badalga berler. 36 klubuň hersi 8 duşuşyk geçirer. Şol duşuşyklaryň 6-sy şu ýylyň dowamynda oýnalsa, galan 2-si geljek ýylyň ýanwar aýynda geçiriler.
UEFA Çempionlar Ligasynda geljek ýylyň fewral aýynda pleý-off duşuşyklary, mart aýynda 1/8 finalyň oýunlary, aprel aýynda çärýek finalyň, apreldir maý aýlarynda-da ýarym finalyň duşuşyklary oýnalar.
Final duşuşygy bolsa geljek ýylyň 30-njy maýynda Wengriýanyň paýtagty Budapeştdäki “Puşkaş Arena” stadionynda geçiriler.
2-nji saýlama tapgyrynyň duşuşyklary (22-23-nji we 29-30-njy iýul):
Çempion toparlar: Lewadiýa/RFS – Iberiýa 1999/Malmö, Žalgris/Hamran Spartans – Dinamo Kiýew (Ukraina), Pafos (Kipr) – Makkabi T. (Ysraýyl), Wikingur/Linkoln Red Imps – Srwena Zwezda (Serbiýa), Noa/Buduknost Podgorisa – Ferenswaroş (Wengriýa), Leh Poznan (Polşa) – Egnatiýa/Breidablik, Kopengagen (Daniýa) – Drita/Differdanž 03, Riýeka (Horwatiýa) – Ludogores Razgrad/Dinamo Minsk, Nýu Seýnts/Şkendiýa – FKSB/Inter Klub d’Eskaldes, Slowan Bratislawa (Slowakiýa) – Wirtus/Zrýinski Mostar, Şelburn/Linfild – Garabag (Azerbaýjan), KuPS/Milsami Orhei – Olimpiýa Lýublýana/Kairat
Çempion däl toparlar: Brann (Norwegiýa) – Red Bull Salsburg (Awstriýa), Wiktoriýa Plzen (Çehiýa) – Serwett (Şweýsariýa), Reýnjers (Şotlandiýa) – Panatinaikos (Gresiýa)
3-nji saýlama tapgyryna goşulýan toparlar:
Nissa (Fransiýa), Feýenoord (Niderlandlar), Benfika (Portugaliýa), Klub Brýugge (Belgiýa), Fenerbahçe (Türkiýe)
Pleý-off tapgyryna goşulýan toparlar:
Seltik (Şotlandiýa), Bazel (Şweýsariýa), Şturm Gras (Awstriýa), Bude-Glimt (Norwegiýa)
Liga tapgyryna gatnaşýan toparlar:
Liwerpul, Arsenal, Mançester Siti, Çelsi, Nýukasl, Tottenham (Angliýa), Napoli, Inter, Atalanta, Ýuwentus (Italiýa), Barselona, Real Madrid, Atletiko Madrid, Atletik Bilbao, Wilýarreal (Ispaniýa), Bawariýa, Baýer, Aýntraht, Borussiýa Dortmund (Germaniýa), PSŽ, Marsel, Monako (Fransiýa), PSW, Aýaks (Niderlandlar), Sporting (Portugaliýa), Ýunion Sent-Žilluaz (Belgiýa), Galatasaraý (Türkiýe), Slawiýa Praga (Çehiýa), Olimpiakos (Gresiýa)
