PDF
UEFA öňümizdäki 25 günüň dowamynda öz guramaçylygyndaky oýnaljak 5 final duşuşygynyň eminleriniň mälim etdi.
5 finalyň arasynda ilkinji bolup geçiriljegi UEFA Ýewropa Ligasynyň finalynda germaniýaly Feliks Swaýer jürlewük çalar. 43 ýaşyndaky emin ilkinji gezek finala gatnaşýar. UEFA Ýewropa Ligasynyň finaly iki iňlis klubunyň “Tottenham” bilen “Mançester Ýunaýtediň” arasynda geçiriler. 21-nji maýda, çarşenbe güni Ispaniýanyň Bilbao şäherindäki “San Mames” stadionynda geçiriljek final Aşgabat wagty bilen 00:00-da başlanar. Duşuşygyň 4-nji emini italiýaly Maurizio Mariani bolar.
2-nji final 24-nji maýda şenbe güni UEFA Zenanlar Çempionlar Ligasynyň finaly bolup, “Arsenal” bilen “Barselona” klublarynyň arasyndaky duşuşyga horwatiýaly Iwana Martinçiç eminlik eder. Duşuşyk Portugaliýanyň paýtagty Lissabondaky Hoze Alwalade stadionynda oýnalar we oýun 21:00-da başlar.
28-nji maýda “Çelsi” bilen “Betisiň” arasyndaky UEFA Konferensiýa Ligasynyň finalynda bosniýa we gersegowinaly Irfan Pelto jürlewük çalar. Çarşenbe güni Polşanyň Wroslaw şäheriniň 42 müň 771 orunlyk adybir stadionynda oýnaljak finalyň 4-nji emini türkiýeli Halil Umut Meler bolar. Duşuşyk 00:00-da başlanar.
Köpleriň sabyrsyzlyk bilen garaşýan UEFA Çempionlar Ligasynyň finalynda bolsa rumyniýaly Iştwan Kowaç eminlik eder. “Inter” bilen PSŽ-niň arasyndaky bu final 31-nji maýda, şenbe güni oýnalar we duşuşyk 00:00-da başlanar. Germaniýanyň Münhen şäherindäki “Allianz Arena” stadionynda geçiriljek finalyň 40 ýaşyndaky baş emini Kowaç 2022-nji ýylda Konferensiýa Ligasynyň, 2024-nji ýylda-da Ýewropa Ligasynyň final oýunlaryna eminlik edipdi. 2 duşuşykda-da italýan klublary ýeňiş gazanypdy. “Inter” bilen PSŽ-niň arasyndaky oýnuň 4-nji emini Žoao Pedro Silwa Pineiro bolar.
UEFA-nyň 5-nji finaly-da Milletler Ligasynyň finaly bolup, 8-nji iýunda Münhen şäherindäki “Allianz Arenada” geçiriljek finala şweýsariýaly Sandro Şarer eminlik eder.
