“UN-Habitat” Türkmenistanda öz taslama edarasyny açmagy meýilleşdirýär

Birleşen Milletler Guramasynyň Adam we ilatly nokatlar boýunça maksatnamasy (UN-Habitat) Aşgabatda öz taslama edarasyny açmak mümkinçiligine garaýar. Bu barada Bakuda geçirilen Bütindünýä şäher forumynyň (WUF13) çäklerinde guramanyň Gündogar Ýewropa we Merkezi Aziýa boýunça sebit direktory Erfan Ali mälim etdi. Mälim bolşy ýaly, häzirki wagtda 25 sany ýurtda işleri utgaşdyrýan sebit bölümi, eýýäm, Moskwa, Kosowo we Baku şäherlerinde öz maksatnamalaryny durmuşa geçirýär, ýakyn wagtda bolsa şeýle edaralaryň biri türkmen paýtagtynda hem işe başlap biler. Sebit direktorynyň nygtamagyna görä, sebitiň döwletleri urbanizasiýanyň işjeň depginini görkezýärler, Aşgabat bolsa durnukly şäher ösüşi meseleleri boýunça halkara dialogynyň möhüm bölegine öwrülýär.
Bu garaşylýan waka «Ak şäherim Aşgabat – 2026» XXV halkara sergisiniň we maslahatynyň çäklerinde 24-nji maýda geçiriljek «Ählumumy dialogdan amaly durmuşa geçirmek: durnukly, inkluziw we “akylly” şäherler» atly BMG-niň ýokary derejeli «tegelek stolunyň» öňüsyrasynda mälim edilen beýanat boldy. Giň gerimli foruma halkara guramalaryň, maýadarlaryň, arhitektorlaryň, inženerçilik kompaniýalarynyň we şähergurluşyk hünärmenleriniň gatnaşmagynda 55 ýurtdan 650-den gowrak wekiliň gatnaşmagyna garaşylýar. Çäräniň dowamynda gatnaşyjylar şäher ösüşiniň halkara ileri tutulýan ugurlaryny bellenilen derejede durmuşa geçirmegi, şol sanda düzümleýin taslamalary, maýa goýum guralyny we sanly çözgütleri ara alyp maslahatlaşarlar.
Duşuşygyň öňüsyrasynda BMG-niň Türkmenistandaky Hemişelik utgaşdyryjysy Dmitriý Şlapaçenko Türkmenistanyň Durnukly ösüş maksatlaryna, aýratyn-da, durnukly şäherlere we ilatly nokatlara degişli bolan Durnukly ösüş maksatlarynyň wezipelerine ygrarlydygyny aýratyn belledi. Öz gezeginde, “UN-Habitat”-yň sebitara geňeşçisi Katýa Şefer durnukly we klimata täsir etmeýän şäherleri ösdürmekde täze tehnologiýalaryň, sanly modelirlemäniň hem-de döwrebap gurluşyk çözgütleriniň ornaşdyrylmagynyň wajyplygyny mälim etdi. Şeýlelikde, Aşgabatda täze taslama edarasynyň açylmagy Türkmenistanyň häzirki zaman şähergurluşygy we durnukly urbanizasiýa boýunça halkara gün tertibine işjeň gatnaşýandygynyň nobatdaky subutnamasydyr.