PDF
Merkezi edarasy Londonda ýerleşýän “Carbon Tracker” şereketi arassa energiýa çeşmelerine gönükdirilýän maýa goýumyň artýandygyny mälim etdi. Bilermenleriň pikirine görä, täze taslamalaryň durmuşa geçirilmegi arassa çeşmelerden alynýan energiýanyň özüne düşýän bahasynyň azalmagyna ýardam edýär. Geçirilen barlaglara görä, bu ugurdaky öňdebaryjy 25 ýurduň maýadarlary “ýaşyl” wodorod önümçiligi üçin 73 milliard dollar pul serişdesini özleşdirer.
“Carbon Tracker”-iň taýýarlan “Arassa wodorodyň energiýa öwrülişigindäki orny” atly maglumatnamada gazylyp alynýan energiýa çeşmeleri arkaly wodorod öndürmegiň bahasynyň gymmatlamagy wodorod arassa energiýa çeşmelerini ulanmak arkaly öndürmegi höweslendiripdir. Munda, esasan, tebigy gazyň bahasynyň galmagynyň täsiri uly bolupdyr.
Ýewropada gazylyp alynýan ýangyç arkaly wodorod önümçiliginiň bahasy her kilogram üçin 7,6 dollara, Aziýada 6,4 dollara çykjakdygy çaklanylýar. “Ýaşyl” energiýa ulanylanda bolsa, önümçiligiň bahasy sebite görä, her kilogramy üçin 3,8-5,8 dollar aralygynda üýtgejekdigi bellenilýär. Geljekde energiýanyň arassa çeşmelerinden peýdalanylyp öndürilýän wodorodyň her kilogramy üçin bahasynyň 2 dollardan arzan bolmagyna garaşylýar.
Germaniýa, Marokko we ABŞ “ýaşyl” energiýadan wodorod öndürmegi meýilleşdirýän ýurtlaryň hataryna girýär. Günorta Afrika Respublikasy, Marokko we Çili 2050-nji ýyla çenli bu ugurda öňdebaryjy ýurtlar bolarlar.
Ýazmyrat Annamyradow, Ýagşygeldi Kakaýew adyndaky halkara nebit we gaz uniwersitetiniň mugallymy
