PDF
«Prix Versailles» binagärlik baýragy 2026-njy ýylda dünýäniň iň owadan otelleriniň sanawyny düzdi. Saýlanyp alnan 16 sany global desganyň ýedisi Ýewropanyň paýyna düşüp, olar binagärlik innowasiýalarynyň ýerli landşaft bilen kämil utgaşmasy hökmünde ykrar edildi. Sanawa Çehiýanyň «Sir Prague», Germaniýanyň «Chiemgauhof Lakeside Retreat», Fransiýanyň «La Fondation» we «Les Roches», Horwatiýanyň «Villa Dubrovnik» hem-de Italiýanyň «Orient Express La Minerva» we «Splendido, A Belmond Hotel» ýaly kaşaň myhmanhanalary girizildi. «Prix Versailles» baýragynyň baş sekretary Žerom Guadeniň bellemegine görä, bu taslamalar içerki we daşarky dizaýnyň kämil nusgasyny jemläp, häzirki zaman medeni globallaşma şertlerinde täze standartlary kemala getirýär.
Saýlanan myhmanhanalaryň her biri taryhy miras bilen döwrebaplygyň sazlaşygyny özünde jemleýär. Hususan-da, Praganyň we Rimiň taryhy binalaryndaky oteller neorenessans hem-de XVII asyryň binagärlik stilini saklap galan bolsa, Germaniýanyň we Horwatiýanyň taslamalarynda tebigy materiallara hem-de landşaft bilen bitewilige aýratyn üns berildi. Parižiň «La Fondation» myhmanhanasy bolsa «asuda kaşaňlygyň» we ýaşyl binagärligiň nusgasy hökmünde görkezildi. Bu halkara ykrar etme diňe bir binalaryň gözelligini däl, eýsem, olaryň jahankeşdeleriň isleglerini kanagatlandyrmakda we ekologiýa taýdan durnuklylygy üpjün etmekde bitirýän uly hyzmatyny hem tassyklaýar.
