PDF
Gazetimiziň geçen sanynda şu ýylyň garaşylýan filmleriniň, esasan hem ýylyň birinji ýarymynda görkeziljek kinolaryň käbirleri baradaky maglumatlary siziň dykgatyňyza ýetiripdik. Bu sanymyzda bolsa, şol sanawyň galan filmleri, esasan hem, güýzde we gyşda görkeziljek kinolar barada söhbet açylar.
“Thunderbolts”
“Marvel” kinematografik äleminiň täze gahrymanlarynyň başdan geçirmesi bolan bu filme Jeýk Şreier režissýorlyk edýär. Filmde baş keşbi Florens Pýu janlandyryp, Sebastian Stan, Olga Kurylenko, Dewid Harbor, Wýatt Rassell, Lewis Pullman dagy beýleki keşpleri ýerine ýetirýär. Maý aýynyň başlarynda ekranlara çykjak kinoda o diýen gahryman hasaplanmaýan topara täze iş tabşyrylýar.
“Lilo & Stitch”
“Disney” studiýasy mundan 23 ýyl ozal, “Lilo we Stiç” atly animasiýany tomaşaçylara ýetiripdi. Şol multfilmiň janly film görnüşi bolan täze ekran eserine Din Fleýşer Kamp režissýorlyk edýär. Maý aýynda ekranlara çykjak kinonyň kastinginde Billi Magnussen, Kris Sanders, Zäk Galifanakis, Hanna Waddingam ýaly artistler bar.
“The Battle of Baktan Cross”
“Hollywood”-yň özboluşly, “auter” režissýorlarynyň biri hökmünde görülýän, 3-4 ýyldan bir kino surata düşürýän Pol Tomas Andersonyň öz ssenarisi esasynda ekranlaşdyrýan täze filminde Leonardo DiKaprio, Benisio del Toro, Rejina Holl, Şon Penn, Alana Haim, Teýana Teýlor, Wud Harris ýaly ussat artistler surata düşýär. Filmiň awgust aýynda prokatlara çykarylmagyna garaşylýar. Filmiň adynyň üýtgedilmegi mümkin.
“The Bad Guys 2”
“DreamWorks Animation” studiýasynyň önümçiliginde 3 ýyl ekranlara çykan “Garagollar” animasiýasynyň 2-nji multfilmi 1-nji awgustdan başlap, tutuş dünýäde görkezilip ugrar. Pier Perifeliň režissýorlygyndaky animasiýanyň gahrymanlaryna Säm Rokwell, Mark Maron, Kreýg Robinson, Awkwafina, Antoni Ramos, Daniella Bruks dagy ses berýär.
“Naked Gun”
1980-90-njy ýyllaryň meşhur uruşly-komediýasy “Ýalaňaç ýarag” filmleriniň täzeçe nusgasy ekranlara çykar. 3 bölümden ybarat şol filmlerde baş keşpde Lesli Nilsen surata düşüpdi. Täze filmde baş keşbi Liam Nison janlandyryp, oňa Pamela Anderson, Pol Wolter Hauzer, Kewin Durand, Denni Hýuston dagy ýoldaşlyk edýär. Akiwa Şafferiň režissýorlygyndaky kino 1-nji awgustda ekranlarda bolar.
“Michael”
Pop aýdym-sazynyň şasy hasaplanýan Maýkl Jekson baradaky “Maýkl” atly film hem ýylyň garaşylýan biografik žanrly kinolarynyň biridir. Filme uruşly kinolar bilen adygan Antuan Fukua režissýorlyk edýär. Filmde Maýkl Jeksonyň keşbini Jaafar Jekson janlandyrsa, Kolman Domingo, Nia Long, Maýlz Teller, Laura Harrier dagy beýleki keşpleri ýerine ýetirýär. Film oktýabr aýynda prokatlara ýaýradylar.
“The Bride!”
4 ýyl öň “Ýitirim bolan gyz” filmi bilen režissýorlyga ädim äden ussat aktrisa Meggi Jillenholl 2-nji gezek kameranyň arkasyna geçýär. Frankenşteýn temaly filmde Jessi Bakli, oskarly Kristian Beýl bilen Penelope Kruz, Annette Benning, režissýoryň ýanýoldaşy, tanymal aktýor Piter Sarsgaard, jigisi, meşhur aktýor Jeýk Jillenholl, Julianna Haf dagy dürli keşplerde çykyş edýär. Film sentýabr aýynyň ahyrlarynda görkezilip başlanar.
“Tron: Ares”
Ylmy-fantastik uruşly “Tron” filmleriniň üçünjisi oktýabr aýynda ekranlara çykar. “Hollywood”-yň norwegiýaly režissýory Ýoahim Ronningiň režissýorlygyndaky filmde baş keşbi Jared Leto janlandyrsa, Ewan Peters, Greta Li, Jeff Brijjes, Jodi Törner-Smit, Kameron Monagan ýaly artistler oňa ýoldaşlyk edýär. “Disney”-iň önümi bolan filme IMAX 3D arkaly hem tomaşa edip bolar.
“Roofman”
Soňky filminden 9 ýyl soň täze bir kino režissýorlyk edýän Derek Sianfransyň nobatdaky ekran eserinde Çanning Tatum, Kirsten Danst, Ben Mendelson, Piter Dinkleýj, Uzo Aduba, Juno Templ ýaly “Hollywood”-yň meşhur artistleri dürli keşpleri ýerine ýetirýär. Kraým hem-de drama görnüşli film oktýabr aýynyň başlarynda ekranlara goýberiler.
“Good Fortune”
Komediýaçy Aziz Ansariniň ilkinji režissýorlyk synanyşygy bolan bu filmde onuň özi bilen bir hatarda, Keanu Riwez, Set Rojen, Keke Palmer, Sandro O ýaly artistler dürli keşplerde surata düşýär. Komediýa görnüşli ekran eseriniň görkezil wagty 17-nji oktýabr diýlip kesgitlenilýär.
“Bugonia”
Soňky ýyllarda adyny köp eşitdirýän gresiýaly režissýor Ýorgos Lantimosyň arakesmesiz ýene bir filmi peýda bolar. 2023-nji ýylda “Görgüli betbagtlar”, geçen ýyl Ýagşylygyň görnüşleri filmlerini ekranlaşdyran režissýoryň täze kinosynda-da baş keşpleri Emma Stoun bilen Jessi Plemons hem-de Alisiýa Silwerstoun dagy janlandyrýar. 2003-nji ýylda ekranlara çykan “Ýaşyl planetany halas et” atly koreý filminiň rimeýki bolan kino 7-nji noýabrda kinoteatrlarda görkeziler.
“Now You See Me 3”
Ilkinjisi 2013-nji ýylda, ikinjisi 2016-njy ýylda ekranlara çykan “Häzir meni görersiň” filminiň täze bölümi hem 2025-nji ýylyň senenamasyny bezär. Ruben Flaýşeriň režissýorlygyndaky kinoda ozalky 2 filmde hem surata düşen Jessi Aýzenberg, Mark Ruffalo, Wudi Harrelson, Deýw Franko, Aýla Fişer, Lizzi Kaplan, Morgan Friman hem-de Daniel Redkliff dagy dürli keşplerde çykyş edýär. Film 14-nji noýabrda ekranlara çykar.
“Wicked: For Good”
Geçen ýylyň şowly çykan filmlerinden, mýuzikal görnüşli “Hyrsyz: Günbataryň jadygöýi hakyndaky erteki” filminiň ikinjisi “Hyrsyz: ýagşylyk üçin” 21-nji noýabrda ekranlarda peýda bolar. Bu filme hem Jon M Çu režissýorlyk edip, kinoda ýene-de Sintia Eriwo, Ariana Grande, Jonatan Beýli, Mişell Ýeo, Jeff Goldblum dagy surata düşýär. 150 million dollar býujetli film birinji kinonyň ähli babatda gazanan başarnygyny gaýtalar diýlip çaklanylýar. Birinji film prokatdan 700 million dollar girdeji toplap, birnäçe abraýly baýraklara dalaşgär görkezildi.
“Zootopia 2”
Animasiýa önümçiliginiň öňdebaryjysy “Disney”-iň 2016-njy ýylda prokata çykaran “Haýwanlar şäheri” atly multfilminiň ikinjisi ýylyň iň esasy garaşylýan ekran eserleriniň hatarynda görkezilýär. 26-njy noýabrda prokatlara ýaýradyljak animasiýa Jeýred Buş bilen Baýron Howard bilelikde režissýorlyk edýär. Aňtawçy towşan bilen tilki täze multfilmde başga-başga wakalaryň üstünden barýar.
“The Running Man”
Tanymal režissýor Edgar Raýtyň belli ýazyjy Stefen Kingiň 1982-nji ýylda çapdan çykan adybir eseri esasynda ekranlaşdyrýan distopik triller görnüşli täze kinosynda Glen Powell, Keýti O’Braýan, Daniel Ezra, Karl Glusman, Joş Brolin, Emiliýa Jons, William H. Meýsi ýaly artistler surata düşýär. 7-nji noýabrda ekranlara çykjak film ýylyň garaşylýan esasy kinolarynyň hatarynda görkezilýär.
“Avatar: Fire and Ash”
Kino sungatynyň iň köp girdeji gazanan 1-nji we 3-nji filmi “Awatar”-yň dowamy bolan bu kino ýylyň ahyrynda, 19-njy dekabrda ekranlara çykar. Seriýanyň 3-nji kinosy bolan filme ýene-de Jeýms Kameron režissýorlyk edýär. Filmde edil öňki ikisinde bolşy ýaly, Sem Wortington, Zou Saldanýa, Sigurni Wiwer, Stefen Lang, Jowanni Ribisi, şol sanda 2-nji filmde kastinge goşulan Keýt Winslet dagy ozalky keşplerini janlandyrarlar. Olaryň hataryna Dewid Telwis bilen Oona Çaplin hem goşular. 250 million dollar býujetli filmiň ýene-de prokatdan 2 milliard dollardan ýokary girdeji gazanmagyna garaşylýar.
“Marty Supreme”
Soňky ýyllarda şowly çykýan filmler bilen ady agzalýan “A24” studiýasynyň önümi bolan bu kinoda Timoti Şalame, Gwinet Paltrow, Taýler Okonma, Abel Ferrara, Penn Žillet ýaly artistler dürli keşpleri ýerine ýetirýär. Film Joşf Safdi režissýorlyk edýär. 25-nji dekabrda ekranlara çykjak filmde 1950-nji ýyllaryň meşhur stol tennisçisiniň karýerasy we durmuş ýoly barada söhbet açylýar.
“Materialists”
Mundan 2 ýyl öň ilkinji kinosy “Öten günler” (Past Lives) filmi bilen hemmäniň ünsüni çeken kanadaly ýaş režissýor zenan Seline Songuň 2-nji ekran eseri “Materialistler” diýlip atlandyrylýar. Kino bilermenleriniň sabyrsyzlyk bilen garaşýan filminde Dakota Jonson, Kris Ewans, Pedro Paskal ýaly häzirki zamanyň meşhur artistleri esasy keşpleri janlandyrýar. Filmiň ekranlara çykjak wagty anyk bolman, ýylyň soňky 2-3 aýynda prokatlara ýaýradylmagyna garaşylýar.
“Jay Kelly”
Meşhur režissýor Noa Baumbahyň täze filminiň ady häzirlikçe resmi ýagdaýda mälim edilmese-de, ekran eseri “Hollywood”-yň men diýen artistlerini özünde jemleýär. “Netflix”-iň önümi boljak filmde Jorj Kluni, Adam Sandler, Laura Dern, Billi Krudap, Raýli Keo, Jim Broadbent, Aýla Fişer, režissýoryň ýanýoldaşy Greta Gerwig, Patrik Wilson, Alba Rowraher ýaly belli artistler surata düşýär.
Ketrin Bigelowyň täze filmi
Oskar gazanan ilkinji zenan režissýor Ketrin Bigelow hem 8 ýyldan soň täze film bilen ekranlara dolanýar. Triller görnüşli täze filmiň ady, şol sanda ekranlara goýberiljek wagty entek belli däl. Uly gyzyklanma bildirilýan bu filmde Idris Elba, Rebekka Ferguson, Jared Harris, Greta Li, Moses Ingram, Treýsi Letts, Jeýson Klark ýaly tanymal artistler dürli keşpleri janlandyrarlar.
“Father, Mother, Sister, Brother”
Garaşsyz kinolaryň ussat režissýory Jim Jarmuşyň täze filmi şu ýylyň dowamynda ekranlarda peýda bolar. “Kaka, eje, uýa, dogan” diýlip atlandyrylýan filmde Keýt Blanşett, Wiki Krips, Adam Draýwer ýaly belli artistler çykyş edýär.
“Nouvelle Vague” hem-de “Blue Moon”
Özboluşly kinolary bilen tapawutlanýan Riçard Linkleýter 2025-nji ýyly 2 film bilen tamamlar. Onuň 1-nji filmi fransuz kinosy bolup, “Täze akym” (Nouvelle Vague) diýlip atlandyrylýar. Kino sungatynyň ägirtlerinden Žan-Luk Godaryň “Soňky demde” filmini düşürişi barada bolan bu kinoda Giýom Marbek, Zoi Doýç, Obri Dullin ýaly artistler esasy keşpleri ýerine ýetirýär. Linkleýteriň beýleki filmi “Mawy aý” (Blue Moon) kinosy bolup, “Sony Pictures Classics”-iň garamagynda maý aýynda prokatlara ýaýradyljak ekran eserinde Itan Hawke, Andrýuw Skott, Margaret Kualli, Bobbi Kannawale ýaly artistler surata düşýär.
“The Phoenician Scheme”
Täsin gara komediýalary bilen adygan meşhur režissýor Wes Andersonyň bu kinosynda-da edil öňki filmlerinde bolşy ýaly, meşhur artistleriň ençemesi dürli keşpleri ýerine ýetirýär. “The Phoenician Scheme” atly bu filmde Benisio del Toro, Maýkl Sera, Bill Mörri, Riz Ahmed, Tom Henks, Benedikt Kumberbetç, Skarlett Ýohansson, Şarlotta Gansbur, Rupert Frend, Willem Dafo, Braýan Kranston dagy çykyş edýär. Filmiň görkeziljek wagty häzirlikçe belli däl.
“The Way of the Wind”
Özüniň 60 ýyla golaý sungat ýolunda az sanly filmi surata düşüren özboluşly režissýor Terrens Maligiň täze kinosynyň şu ýylyň dowamynda ekranlara çykmagyna garaşylýar. Epiki görnüşdäki filmde Geza Rörig, Mattias Şoenarts, Mark Raýlans, Ben Kingsli, Ýosef Faýns, Tawfik Barhom, Býorn Tors, Duglas But ýaly tanymal artistler çykyş edýär.
Gazetimiziň geçen sanynda berlen hem-de ýokarda ady agzalan filmlerden başga-da, fransuz, koreý, meksikan, nemes, italýan, hindi, ispan, ýapon hem-de iňlis kinolarynyň arasynda garaşylýanlarynyň sany az bolmaz. Italiýaly režissýor Paolo Sorrentinonyň täze kinosy “Parthenope”, fransiýaly režissýor Arno Depleşeniň “Spectateurs!”, fransuz režissýory Lusil Hadžihalilowiçiň “La Tour de glace”, fransiýaly meşhur kinematograf Luk Bessonyň “Dracula: A Love Tale”, ýene-de Fransiýadan Sedrik Himenesiň “Chien 51”, ispaniýaly Alehandro Amenabaryň “El cautivo”, germaniýaly Tom Tykweriň “Das Licht”, germaniýaly Kristian Petzoldyň “Miroirs No. 3”, hytaýly Bi Ganyň “Resurrection”, hindistanly Şiw Rawailiň “Alpha”, russiýaly Andreý Zwýaginsewiň “Jupiter”, finlýandiýaly Ari Asteriň baş keşpde Hoakin Finiksiň surata düşýän “Eddington”, amerikaly Kelli Raýkardyň “The Mastermind”, koreýaly Pak Çhan Ukuň “No Other Choice”, daniýaly Ýoahim Trieriň “Sentimental Value” atly filmleri 2025-nji ýylda ekranlara çykjak beýleki kinolar bolar. Bulardan başga-da, “Nobody 2”, “The Smurfs Movie”, “Animal Friends”, “Sarah’s Oil”, “Downton Abbey 3”, “Saw XI”, “The Housemaid” ýaly filmler hem prokatlarda orun alar.
