PDF
Hemmäniň sabyrsyzlyk bilen garaşýan Angliýa bilen Argentinanyň arasyndaky ýarym final duşuşygy çarşenbe güni oýnalar. 15-nji iýuldan 16-njy iýula geçilýän gije oýnaljak oýunda amerikaly Ismail Elfath jürlewük çalar. Atlantadaky “Mercedes-Benz Stadium”-da boljak oýun Aşgabat wagty bilen 00:00-da başlanar.
Duşuşyk 2 toparyň arasyndaky 15-nji oýun bolar. Mundan öňki 14 oýna seredilende, Angliýanyň 6, Argentinanyň 2 ýeňşi bolup, 6 duşuşyk deňlikde tamamlandy. Gollarda Angliýanyň ýygyndysy 21-15 öňde barýar.
Iki topar ilkinji gezek 1951-nji ýylda Wembley-de duşuşypdy we şol oýunda iňlisler 2-1 hasabynda ýeňipdi. Olaryň arasyndaky 2-nji duşuşyk 1953-nji ýylda Buenos-Aýresde oýnalyp, argentinler 3-1 hasabynda utdy. Ýöne bu duşuşyk 2 ýurduň federasiýasy tarapyndan halkara duşuşyk diýlip kabul edilmeýär.
Toparlaryň arasyndaky iň soňky oýun 2005-nji ýylda hasaba alnyp, Ženewadaky duşuşykda Angliýa 3-2 üstün çykypdy (Runi, Owen 2 – Krespo, Samuel).
Bu toparlar Dünýä Kubogynda mundan öň 5 gezek gabatlaşdylar. Şolaryň soňky 2-si taryhy wakalara baý bolup, Dünýä Kubogynyň ýatdan çykmajak oýunlarynyň arasynda görkezilýär. Dünýä Kubogyndaki ilkinji duşuşyk 1962-nji ýylda bolup, Angliýa 3-1 hasabynda ýeňýär. 1966-njy ýylda-da Angliýa Jorj Hörstüň ýeke-täk goly bilen üstün çykýar.
Bu duşuşykdan 20 ýyl, 1986-njy ýylda “Estadio Azteca”-daky duşuşyk futbolyň taryhyna girýär. Bu oýunda argentinler Maradonanyň taryhy, ikonik gollary esasynda 2-1 hasabynda utýar. Syýasy wakalar sebäpli dartgynly geçen oýunda Maradona ilki eli bilen, soňra meýdançanyň orta gürpünden alan topy bilen öňünden çykan iňlisleri aldap, asyryň goluny geçirýär.
1998-nji ýylda 1/8 finalda 2 topar DK-niň çägindäki 4-nji duşuşygyny oýnaýar. Bu oýun hem dartgynly geçip, duşuşygyň esasy wagty 2-2 deňlikde tamamlanýar (Batistuta, Zanetti – Şirer, Owen). Dewid Bekhamyň gyzyl kart alan oýnunda penaltileriň netijesinde argentinler ýeňiş gazanan tarap bolýar. Duşuşykda Maýkl Owen Dünýä Kubogynyň iň owadan gollarynyň birini geçiripdi.
2002-nji ýylda Ýaponiýanyň Sappora şäherinde oýnalan toparçadaky oýunda Angliýanyň ýygyndysy 4 ýyl öň gyzyl kart alyp, ýeňlişiň günäkäri diýlip bellenen Bekhamyň ýeke-täk goly bilen 1-0 hasabynda utýar.
