Germaniýanyň milli ýygyndysynyň ozalky ýyldyzlaryndan Andreas Breme 63 ýaşynda aradan çykdy. Öten agşam ýüregagyrysy sebäpli hassahana alyp gidilen Bremeni halas etmek başartmady. Bu barada “Bild” gazeti habar berýär. Habarda Bremeniň ozalky tälimçisi Frans Bekkenbaueriň aradan çykmagynyň täsirinden doly saplanyp bilmändigi hem bellenilýär.
1960-njy ýylyň 9-njy noýabrynda Germaniýanyň Hamburg şäherinde dünýä inen Andreas Breme 1978-nji ýylda şäheriň “Barmbek-Ulenhorst” klubunda futbola başlap, bu ýerde 2 ýyl oýnady. Soňra 1 möwsüm “Saarbruken” toparynda çykyş eden Breme 1981-1986-njy ýyllar aralygynda “Kaiseirslautern” toparynyň köýnekçesini geýýär. 2 möwsüm “Bawariýada, 4 möwsüm “Interde”, 1 möwsüm “Saragosada” çykyş edip, 1993-nji ýylda täzeden “Kaiserslautern” toparyna dolanýar. Bu klubda ýene-de 5 ýyl çykyş edip, 1998-nji ýylda karýerasyny tamamlaýar. Ol klublarda 623 oýunda 80 gol geçirýär. Çep gyraky goragçy, ýarymgoragçy bolup oýnan Andreas Breme Germaniýanyň milli ýygyndysynda 86 gezek çykyş edýär. Ol şol oýunlarda 8 gezek tapawutlanýar. Onuň iň ýatda galan esasy goly-da 1990-njy ýyldaky Dünýä Kubogynyň finalynda Argentinanyň derwezesinden 85-nji minutda geçiren penalti goly bolýar. Şol gol bilen Germaniýanyň ýygyndysy 3-nji çempionlygyny gazanýar.
Ol Dünýä Kubogynyň çempionlygyny gazanan Bremeniň “Bundesligada” 2, “Serie A”-da 1 çempionlygy bar. Şol sanda “Interde” UEFA Kubogyny, Italiýanyň Super Kubogyny, “Bawariýada” Germaniýanyň Super Kubogyny, “Kaiserslauternde” Germaniýanyň Kubogyny gazanýar. Onuň “Kaiserslautern” bilen “Bundesliga 2”-niň çempionlygy hem bar.
