14-nji maýda Kazanyň “Kazan Ekspo” halkara sergi merkezinde “Russiýa – Yslam dünýäsi: KazanForum” atly XV halkara ykdysady forumy öz işine başlady.
Bu forum “Russiýanyň eksport merkezi” paýdarlar jemgyýetiniň Baş direktory Weronika Nikişinanyň Russiýada “Halkara hyzmatdaşlyk we eksport” milli taslamasyny durmuşa geçirmek meselesi baradaky çykyşy bilen öz işine başlady. 19-njy maýa çenli dowam etjek bu forumda ministrler derejesindäki maslahatlar geçirilip, olaryň barşynda ykdysadyýetiň dürli pudaklarynyň ösüşi ara alnyp maslahatlaşylar.
Kazanyň “Agropompark” merkezinde “Kazan Halal Market” sergisi ýaýbaňlandyryldy. Bu ýerde dünýäniň 4,5 müňden gowrak görnüşli önümi sergilenýär. “Russiýa – Yslam dünýäsi: KazanForum” atly halkara ykdysady forumy 2009-njy ýyldan bäri her ýyl Kazanda guralýar. Russiýanyň Prezidenti Wladimir Putiniň karary bilen bu çäre geçen ýyldan başlap federal ähmiýete eýe boldy.
Mundan öň, Tatarystanyň maýa goýumlaryny ösdürmek boýunça gullugynyň başlygy Talia Minullina maý aýynyň başynda foruma 79 ýurtdan 11 müňe golaý gatnaşyjynyň hasaba alnandygyny belläp, iň uly wekiliýete Müsürden, Indoneziýadan, Gazagystandan, Liwiýadan, Malaýziýadan, Saud Arabystanyndan, Senegaldan, Türkmenistandan we Özbegistandan garaşylýandygyny aýdypdy.
Guramaçylaryň bellemegine görä, bu ýyl 15-nji gezek geçirilýän forum Russiýa bilen Yslam Hyzmatdaşlyk Guramasynyň ýurtlarynyň arasynda söwda, ykdysady, ylmy, tehniki, sosial we medeni gatnaşyklary pugtalandyrmak üçin platforma bolup hyzmat eder.
