Hepdäniň şenbe güni, ýagny ertir, 25-nji maýda futbol janköýerlerine ençeme final duşuşyklary garaşýar. Golaýda BMG tarapyndan 25-nji maý Bütindünýä futbol güni diýlip hem yglan edilipdi we bu halkara baýramçylygynyň ilkinji bellenilýän gününiň üsti birnäçe final duşuşyklary bilen ýetiriler.
Ertir final duşuşyklarynyň 5-si geçiriler. Şol bir wagtyň özünde-de Russiýanyň hem-de Belgiýanyň çempionatynda çempionlar belli bolar. Russiýanyň “Premýer Ligasynda” 30-njy tapgyrynyň duşuşyklary 18:30-da başlap, esasan hem 2 duşuşyk final derejesinde geçer. «Dinamo» bilen “Krasnodaryň” hem-de «Zenit» bilen “Rostowyň” arasyndaky duşuşyklaryň netijesi çempiony kesgitlär.
19:00-da başlanjak dünýäniň iň gadymy ýaryşy bolan Angliýanyň FA Kubogynyň finalynda bassyr 2-nji gezek Mançester derbisi oýnalar. “Wembley”-de geçiriljek duşuşykda “Mançester Siti” bilen “Mançester Ýunaýted” özara güýç synanyşar.
21:00-da başlanjak AFK Çempionlar Ligasynyň finalynyň jogap duşuşygynda-da BAE-niň “Al-Ain” topary öz meýdançasynda Ýaponiýanyň “Ýokohama F. Marinos” topary bilen duşuşar. 1-nji oýunda ýaponlar 2-1 hasabynda ýeňiş gazanypdy.
21:00-da başlanjak başga bir halkara ýaryşyň finalynda-da – UEFA Zenanlar Çempionlar Ligasynyň finalynda Fransiýanyň «Lion» topary bilen Ispaniýanyň “Barselona” kluby Bilbao şäherinde özara güýç synanyşarlar.
23:00-da Germaniýanyň Kubogy ýaryşynyň finalynda 2-nji ligada çykyş edýän “Kaizerslautern” bilen “Bundesliganyň” täze çempiony “Baýer” duşuşar.
00:00-da Fransiýanyň Kubogy ýaryşynyň finalynda çempion PSŽ bilen “Lion” klublary meýdança çykarlar.
Şeýle-de, 26-njy maýda-da, ýagny ýekşenbe güni Türkiýäniň çempiony hem belli bolar. Şol sanda “Lids” bilen “Southempton” toparlaryndan haýsy hem bolsa biri «Premier Liga» çykar.
