Dünýäniň iň garry ynsany hasaplanýan Mariýa Branýas Morera 117 ýaşynda aradan çykdy. Ömrüniň ahyryna çenli Ispaniýada ýaşan Morera 1907-nji ýylyň 4-nji martynda ABŞ-nyň San-Fransisko şäherinde dünýä inipdir. Maşgalasy Moreranyň X akkaundynda “Mariýa Branýas aramyzdan gitdi. Ol isleýşi ýaly gitdi: ukudaka, rahat ýagdaýda we gynalman” diýlip ýazdy.
Geçen ýyl fransiýaly zenan Lýusil Randon aradan çykandan soňra, 100 ýaşdan ulularyň maglumatlaryny tassyklaýan Gerontologiýa barlag topary Moreranyň dünýäniň iň uly ýaşly ynsanydygyny mälim edipdi. Morera şu ýylyň martynda 117 ýaşapdy.
Häzirki wagtda toparyň sanawynyň ikinji ýerinde ýaponiýaly, 116 ýaşly Tomiko Ituka bar. Şeýlelikde indi dünýäniň iň garry ynsany Ituka boldy.
Morera 23 ýyldan bäri ýurduň katalan şäheri bolan Olotda garrylar öýünde ýaşaýardy. Morera mundan ozal uzak ýaşamagy barada soralanda, “tertip, asudalyk, maşgala we dostlar bilen gowy gatnaşyk, tebigata garylmak, duýgy taýdan kadalyly, aladasyzlyk, puşman etmezlik, has köp oňyn pikirlenmek we “zäherli” adamlardan uzak durmak” diýip belläpdi.
Şeýle-de bolsa 1936-njy ýylda Morera 29 ýaşynda wagty Ispaniýada bolup geçen uruş onda erbet ýatlamalar galdyrypdyr.
