Germaniýanyň çempionaty “Bundesligada” “Bawariýa” öz meýdançasynda “Fraýburgy” 2–0 hasabynda ýeňlişe sezewar etdi. Münhen şäheriniň wekiline ýeňiş getiren gollary 38-nji minutda penaltiden Harri Keýn hem-de 78-nji minutda Tomas Müller geçirdi. Duşuşykda 59-njy minutda oýna giren Tomas Müller taryhy rekordy täzeledi. Ol “Bawariýanyň” düzüminde 710-njy gezek meýdança çykyp, meşhur derwezeçi Sepp Maýeriň rekordyny täzeledi we münhenlileriň köýnekçesini iň köp duşuşykda geýen futbolçy boldy. 34 ýaşyndaky ýyldyz oýunçy “Bundesligada” 475, Kubok ýaryşynda 66, UEFA–nyň ýaryşlarynda 153 we beýleki resmi bäsleşiklerde 16, jemi 710 gezek “Bawariýanyň” düzüminde meýdança çykdy. 1962–1980-nji ýyllar aralygynda “Bawariýanyň” derwezesini goran Sepp Maýer 709 duşuşykda oýnapdy. 2008-nji ýyldan bäri “Bawariýanyň” esasy düzüminde oýnap gelýän Tomas Müller 17 ýyllyk karýerasynda 710 oýunda 245 gol geçirdi.
