Ispaniýanyň çempionatynda tapgyryň merkezi oýnunda, Madrid derbisinde ýeňiş gazanan bolmady. Myhmançylykda “Atletiko” bilen duşuşan “Real” 64-nji minutda Militaonyň goly esasynda öňe saýlandy. Ýöne şol pursatdan soň “atletikoly” janköýerler meýdança dürli zatlary zyňyp başladylar. Ahyrynda emin oýny togtatmaly boldy. 15 minutlyk arakesmeden soň galan ýerinden başlan oýnuň 90+5-nji minutynda Anhel Korrea hasaby deňledi. Oýnuň ahyrynda-da “Atletikodan” Llorente gyzyl kart aldy. Şunlukda, duşuşyk 1-1 hasabynda deňlikde tamamlandy. “Real Madrid” çempionatdaky ýeňlişsiz ýörişini 40 oýna ýetirip, “Barselonanyň” rekordyna ýene bir ädim golaýlady. Şol bir wagtyň özünde “Reala” “Atletikony” çempionatda 4, umumylykda-da esasy wagtda 7 oýundan bäri ýeňmek başardanok.
“Real Madrid” ähli ýaryşlary hasaba alanyňda 36 oýundan bäri ýeňilmän gelýär. Ançelottiniň şägirtleri soňky gezek ýanwada utulypdy.
