Ýangyn howpsuzlygynyň düzgünlerini berjaý etmek biziň her birimiziň borjumyzdyr. Türkmenistanyň Içeri işler ministrliginiň Döwlet ýangyn howpsuzlygy gullugy ildeşlerimiziň ýaşaýyş jaýlarynda, iş ýerlerinde ýangyn dörän halatynda ýerine ýetirmeli borçlary barada, öz maslahatlarydyr nesihatlary bilen ýüzlenip, şulary ýatladýar.
Ýaşaýyş jaýlarydyr desgalarda ýa-da olaryň çäginde ýangyn hadysasy dörän halatynda, ilkinji nobatda, Döwlet ýangyn howpsuzlygy gullugynyň ýangyn söndüriş söweşjeň toparyny öý ýa-da iş telefonlaryndan 01-e, el telefonyndan 001 belgä jaň edip, ýangynyň dörän salgysyny we degişli maglumatlary ýangyn söndüriş söweşjeň toparyna habar bermeli. Şondan soň, suw çeşmelerine we ýangynyň dörän ýerine gelýän ýollara belet adamy ýangyn söndüriş söweşjeň toparynyň öňünden çykmak üçin ugradyp, binadyr desgalardan kömege mätäç adamlary halas etmegi we olaryň howpsuzlygyny üpjün etmegi ugrukdyrmaly. Halas ediş işleri bilen bir hatarda, öýlerde ýa-da iş ýerlerinde bar bolan ýangyn söndüriş serişdeleri, ot söndüriji, içki ýangyn kranlary, ýangyn söndürmegiň göçme enjamlary we şuňa meňzeşler bilen ýangynyň ojagyny söndürmäge girişmeli. Zerurlyk ýüze çykan halatynda gazdan halas ediş, lukmançylyk we beýleki gulluklary çagyrmaly.
Ýangyny söndürmek boýunça işleri geçirýän adamlardan başga, boş duran adamlary ýangynyň çäginden çykaryp, meýdançada howpsuz ýerde bolmaklaryny üpjün etmeli. Zerur bolan ýagdaýynda elektrik energiýasyny öçürmegi, enjamlary, agregatlary, enjamlary saklamaga, çig mal, gaz, bug we suw ulgamyny ýapmagy, wentilýasiýalar ulgamlaryny togtatmagy guramaly, tüsse çykaryjy ulgamy işledip, ýangynyň ýaýramagynyň öňüni almak boýunça çäreleri amala aşyrmaly. Ýangyn söndürmäge gatnaşýan adamlary mümkin bolan elektrik togundan, zäherlenmekden, ýanykdan, düzütleriň üstüne ýykylmagyndan goramagy üpjün etmeli. Ýangyn söndürmek bilen bir wagtda ýokary temperaturanyň täsirinde howp salýan jaýyň gurluşyk düzütlerini we tilsimat enjamlaryny sowatmagy ýola goýmaly. Ýangyn söndüriş söweşjeň toparynyň gelmegi bilen, kärhananyň wekili, ýagny ýangyn söndürmäge ýolbaşçylyk eden, ýangyn söndüriş söweşjeň toparynyň ýolbaşçysyna ýangynyň ojagy barada zerur bolan hemme maglumatlary habar bermäge borçludyr.
Türkmenistanyň Içeri işler ministrliginiň ýanyndaky Ýangyn howpsuzlygy müdirliginiň wagyz-nesihat bölümi.
