Dünýä Kubogy 2026-nyň saýlama duşuşyklarynyň çäginde Aziýa zolagynda 3-nji tapgyryň toparçalardaky 5-nji duşuşyklary geçirildi.
“A” toparçadaky duşuşyklar köp golly bolup, ýeňiş gazanan toparlaryň 2-sine 3 utugy almak ýeňil düşmedi. Laos döwletinde oýnalan duşuşykda Demirgazyk Koreýanyň ýygyndysy Eýranyň ýygyndysyndan 3-2 hasabynda asgyn geldi. 1-nji ýarymda Eýranyň ýygyndysy Gaýediniň 29-njy, Mohebiniň 41-nji we 45-nji minutlardaky gollary bilen 3-0 öňe saýlandy. 2-nji ýarymda başgaça oýun görkezen Demirgazyk Koreýanyň ýygyndysy gysga wagtda 2 gol geçirdi. 56-njy minutdaky Mehdi Tareminiň awtogoly hem-de 59-njy minutdaky Kim Ýu Sonuň gollary bilen hasap 3-2 boldy. Ýöne galan minutlarda Eýranyň ýygyndysy üstünligini saklamagy başardy we 3-2 hasabynda ýeňşini baýram etdi.
Toparçadaky beýleki bir duşuşyk hem şol hasap bilen tamamlandy. Öz meýdançasynda Özbegistany kabul eden Katar 1-nji ýarymda Almoez Aliniň 25-nji hem-de 41-nji minutdaky gollary bilen 2-0 öňe saýlandy. Ýöne 2-nji ýarymyň soňky 15 minutynda, has takygy, 75-nji we 80-nji minutlarda Özbegistanyň SSKA Moskwada çykyş edýän hüjümçisi Abbosbek Faýzullaýew 2 gol geçirip, hasaby deňlese-de, 90+12-nji minutda Lukas Mendesiň goly katarlylara ýatdan çykmajak ýeňiş getirdi. Bu özbekleriň 3-nji tapgyrdaky ilkinji ýeňlişi boldy.
Şeýle-de, BAE-niň ýygyndysy öz meýdançasynda Gyrgyzystanyň ýygyndysyny Abdalla (15, 89) hem-de Meloniniň (35) gollary bilen 3-0 hasabynda ýeňdi.
