Ispaniýanyň çempionatynda 12-nji tapgyryň galdyrylan duşuşygynda “Walensiýa” öz meýdançasynda “Real Madridi” kabul etdi. Çekeleşikli we dartgynly geçen oýunda Reala ýeňiş gazanmak ýeňil düşmedi. Oýnuň 27-nji minutynda ýer eýeleri Hugo Duronyň goly bilen öňe saýlandy. Duşuşygyň 1-nji ýarymy şol hasap bilen tamamlandy. Esasanam 2-nji ýarymy wakalara baý bolan oýnuň 55-nji minutynda madridlilere hasaby deňlemäge uly mümkinçilik boldy. Ýöne Jud Bellingam uran penaltisi sütünden yzyna gaýtdy. 61-nji minutda Kilian Mbappeniň goly VAR-yň görkezmesi bilen ofsaýt sebäpli hasaba alynmady. 79-njy minutda bolsa “Walensiýanyň” derwezeçisi bilen Winisius Junioryň arasyndaky sene-meneden, itekleşmeden soň emin braziliýaly hüjümçä gyzyl kart görkezdi. Ol 2023-nji ýyldaky duşuşykda-da milletparazlyk bilen baglanyşykly wakalardan soň oýnuň ahyrlarynda gyzyl kart alypdy. 1 oýunçy kem galandygyna garamazdan, “Real Madrid” 85-nji minutda Bellingamyň pasyndan soň Luka Modriçiň goly bilen hasaby deňledi. 90+5-nji minutda bolsa penaltini salyp bilmedik Bellingam tapawutlanyp, toparyna ýeňiş getirdi. Şunlukda, “Real Madrid” topary “Walensiýany” myhmançylykda 3 ýyldan soň ýeňmegi başardy. Bu ýeňişden soň utugyny 43-e çykaran “Real Madrid” sanawda 1-nji orna beýgeldi. 1 oýny kem “Atletiko Madrid” 2-nji orna düşüp, onuň 41 utugy bar.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА