PDF
Häzirki wagtda Aşgabat şäheriniň 145 ýyllygy mynasybetli paýtagtymyzda geçiriljek dabaraly çärelere taýýarlyk görülýär. Bu şanly senede dürli ugurlara bagyşlanan maslahatlary, döredijilik duşuşyklaryny, wagyz-nesihat çärelerini, aýdym-sazly dabaralary, sergileri, paýtagtymyzyň gözel künjeklerine gezelençleri guramak meýilleşdirilýär. Şu ýylyň 24-25-nji maýynda “Ak şäherim Aşgabat” atly XXV köpugurly halkara sergini we maslahaty geçirmek göz öňünde tutulýar. Halkara sergide ýurdumyzyň ministrlikleriniň, pudaklaýyn dolandyryş edaralarynyň, ýerli hususy kärhanalaryň, daşary ýurt kompaniýalarynyň dürli ugurlarda gazananlaryny görkezýän sergi bölümlerini guramak meýilleşdirilýär. Serginiň çäklerinde geçiriljek maslahatyň dowamynda paýtagtymyzy “akylly” şäher konsepsiýasyna laýyklykda ösdürmek, maýa goýumlary çekmek meseleleri ara alnyp maslahatlaşylar. Baýramçylyk günlerinde “Aşgabat” aýdym-saz merkezinde sungat ussatlarynyň konserti ýaýbaňlandyrylar.
Dabaralara görülýän taýýarlygyň çäklerinde paýtagtymyzyň şaýollaryny, köçelerini arassa saklamak we olaryň ugrundaky binalaryň abadanlaşdyrylyşy, bezelişi, yşyklandyrylyşy bilen baglanyşykly toplumlaýyn işler amala aşyrylýar. Bu barada 15-nji maýda geçirilen sanly ulgam arkaly Ministrler Kabinetiniň mejlisinde Ministrler Kabinetiniň Başlygynyň orunbasary B.Annamämmedow Aşgabat şäheriniň 145 ýyllygy mynasybetli paýtagtymyzda geçiriljek dabaraly çärelere görülýän taýýarlyk işleri barada hasabat berdi.
