PDF
Germaniýanyň Saksoniýa-Anhalt sebitinde geçirilen parlament (landtag) saýlawlarynda “Germaniýa üçin alternatiwa” (AfD) partiýasy 44% ses alyp, taryhy we ynamly ýeňiş gazandy. Ýurduň gündogar sebitindäki syýasy meýdanda düýpli öwrülişik bolup geçdi. Bu üstünlik partiýanyň bäş ýyl ozalky görkezijisini iki esse artdyrandygyny we sebitde iň güýçli syýasy güýje öwrülendigini görkezip, federal derejedäki durnuklylyga hem täsir ýetirdi.
Saýlawlara gatnaşýan ilatyň işjeňligi hem Germaniýa birleşeninden bäri iň ýokary derejä ýetip, raýatlaryň takmynan, 80 göterimi saýlaw uçastoklaryna geldi. Saýlawlara 1,7 million töweregi saýlawçy gatnaşdy. Bu gezekki ses berişlikde saýlawlara öň gatnaşmadyk raýatlaryň köpçülikleýin gatnaşmagy we öň başga partiýalara ses berenleriň «AfD»-niň tarapyna geçmegi esasy üns merkezinde boldy.
Kansler Fridrih Mersin ýolbaşçylygyndaky häkimiýet başyndaky Hristian-demokratik birleşigi (CDU) üçin bu saýlawlar garaşylyşyndan pes boldy. Hristian demokratlar 18% töweregi ses alyp, sebitdäki taryhynda pes netijeleriň birini görkezdi we öňki saýlawlar bilen deňeşdirilende, sesleriniň ep-esli bölegini ýitirip, ýerli saýlaw okruglarynda göni mandat gazanyp bilmedi.
Saýlawyň netijelerine görä, üçünji orny 9,3% ses bilen Germaniýanyň Sosial-demokratik partiýasy (SPD) eýeledi. Şeýle hem “Ýaşyllar” 8,9%, Çepçi partiýa (Die Linke) 8,6% hem-de “Sara Wagenknehtiň birleşigi” (BSW) 5,3% ses toplap, ýerli parlamente wekillerini saýlamagy başardylar. FDP 2% ses toplap, bäş göterimlik çäkden geçip bilmedi we parlamentiň daşynda galdy.
Hristian-demokratik birleşiginiň (CDU) bu saýlawlardaky netijeleri käbir synçylar tarapyndan häzirki hökümetiň alyp barýan käbir içerki we daşary syýasatyna garşy ilatyň bildiren garaýyşlarynyň netijesi hökmünde baha berilýär. Saýlawlardan soňky döwürde täze hökümeti düzmek üçin syýasy taraplaryň arasynda giňişleýin geňeşmeler we gepleşikler dowam etdirilýär. Täze parlamentde wekilleri bolan partiýalaryň arasyndaky garaýyşlaryň dürlüligi sebäbi, geljekki hökümet düzümi baradaky taraplaryň barlaglary hem-de hyzmatdaşlyk mümkinçilikleri ýerli metbugat tarapyndan üns merkezinde saklanýar.
