Gazagystan sebitde emeli aň we sanly tehnologiýalar boýunça iň uly merkezi döretmegi maksat edinýär. «Kazahtelekom» telekommunikasion kompaniýasynyň ýolbaşçysy Bagdat Musin «AI and Digital Bridge» forumynda çykyş edip, ýurduň hasaplaýyş kuwwatlaryny giňeltmek we dünýäniň öňdebaryjy IT kompaniýalaryny çekmek boýunça strategik meýilnamalaryny beýan etdi. Bu ädim döwletiň ählumumy sanly giňişlikdäki ornuny has-da berkitmäge gönükdirilendir.

Ýurduň bu ugurda uly mümkinçiliklere eýe bolmagy elýeterli energiýa çeşmeleriniň hem-de ösen telekommunikasiýa infrastrukturasynyň sazlaşykly utgaşmagyna esaslanýar. Häzirki wagtda emeli aň modellerini netijeli öwretmek üçin zerur bolan giň göwrümli maglumat merkezlerini üpjün etmek maksady bilen, goşmaça 5 gigawata çenli energiýa kuwwatlyklaryny bölüp bermek göz öňünde tutulýar.

Halkara hyzmatdaşlygy ösdürmek we ýerli inženerçilik kuwwatyny artdyrmak sanly strategiýanyň ileri tutulýan ugurlarynyň biri bolup durýar. Bu babatda NVIDIA ýaly dünýäniň IT ägirtleri bilen işjeň gatnaşyklar ýola goýulýar. Şunuň bilen birlikde, maglumatlary geçirmegiň üstaşyr ugurlary giňeldilip, signal gijikmesini 45 millisekunda çenli azaltmak üçin Hazar sebitiniň üstünden geçýän süýümli-optiki torlar çekilýär hem-de durnukly aragatnaşygy üpjün etmek üçin ýerüsti we kosmos ulgamlary utgaşdyrylýar.

Amatly geografiki ýerleşişi we döwlet derejesinde berilýän goldaw arkaly Gazagystan Merkezi Aziýa sebitine döwrebap sanly we hasaplaýyş hyzmatlaryny hödürlemäge taýýarlanýar. Bu giň gerimli başlangyçlar ýurduň ykdysadyýetini diwersifikasiýa ýoly bilen ösdürmäge we ýokary tehnologiýalar bazarynda möhüm sebit ornuny eýelemäge giň mümkinçilikleri açýar.

Gyzykly bolup bilerЕЩЕ ОТ АВТОРА