ABŞ-nyň iň köp barylýan “Great Smoky Mountains” milli goraghanasy we seýilgähi ýurtda emele gelen ýagdaý sebäpli köp wagtlap dowam eden arakesmeden soň ýene-de açyldy. “9-njy maýda seýilgähe barmaga mümkinçilik döredilip, bu ýere gelýänleriň saglygy we howpsuzlygy ileri tutulýan meseleleriň biri bolar” diýlip, seýilgähiň müdirliginiň beýanatynda aýdylýar.
2018-nji ýylda takmynan, 11,5 million adam “Great Smoky Mountains” goraghanasyna baryp gördi. Seýilgäh ajaýyp dag gerişleri, derýalary, şaglawuklary we köp sanly endemik ösümliklerden we haýwanlardan doly giň tokaýlary bilen meşhurdyr. Şeýle hem bu seýilgähde amerikan baribal gara aýylarynyň köp sanlysy ýaşaýar.
“Great Smoky Mountains” milli seýilgähi Amerikanyň iki ştatynyň – Tennessi we Demirgazyk Karolinanyň çatrygynda ýerleşýän tebigy goraghanadyr. Onuň ady “Uly tüsse daglary” diýlip terjime edilip, amerikalylaryň özleri gepleşikde bir söz bilen “Tüsse” diýýärler. Dag gerişlerini gurşap alan dumanlar sebäpli seýilgäh şeýle üýtgeşik ada eýe bolupdyr.
Dumanlaryň emele gelmegi, Meksika aýlagyndan gelýän ýyly çygly howa akymlarynyň hereketi we Appalaçi daglarynyň ýokarky böleginde sowamagy bilen baglanyşyklydyr. Birinji bakyşda manzara birneme gorkunç bolup görünmegi hem mümkin, sebäbi bu ýerini gaplap alýan dumanlar burugsaýan tüsselere meňzeýär.
Milli seýilgäh biosfera goraghanasynyň bir bölegi bolup, ÝUNESKO-nyň Bütindünýä mirasynyň sanawyna goşulandyr. Seýilgäh 1934-nji ýylda ABŞ-nyň Kongresiniň karary bilen döredilip, 1940-njy ýylda Prezident Franklin Ruzwelt bu seýilgähiň resmi taýdan açylýandygyny yglan edýär. Seýilgähiň umumy meýdany 2108,76 inedördül kilometr bolup, Amerikanyň gündogaryndaky iň uly goralýan tebigy ýerleriň biridir.
