UEFA Çempionlar ligasynyň finalynda “Bawariýa” topar PSŽ-ni Kingsli Komanyň 59-njy minutdaky ýeke-täk goly bilen 1-0 hasabynda ýeňip, 6-njy gezek çempionlyk gazandy. “Bawariýa” mundan ozal, 1974-nji, 1975-nji, 1976-njy, 2001-nji, 2013-nji ýyllarda-da kubogy eýeläpdi. Şeýlelikde, “Bawariýa” topary “Liwerpul” bilen deňleşip, “Real Madrid” (13) we “Milandan” (7) soň, 3-nji orunda barýar. 11-nji finalynda 6-njy gezek kubogy eýelän “Bawariýa” ähli duşuşygynda-da ýeňiş gazanyp, çempion bolan ilkinji topar hökmünde taryha girdi. “Bawariýanyň” ýeňiş goly, olaryň Çempionlar ligasyndaky 500-nji goly hökmünde hasaba alyndy. Münhenliler bu ugurda “Real Madrid” (567 gol) we “Barselonadan” (517 gol) soň, 3-nji orny eýeleýär. “Bawariýa” topary 2 aýyň dowamynda 3-nji kubogyny gazandy. Ýerli kuboklarda – “Bundesliga” bilen hem-de Germaniýanyň Kubogy ýeňişleriniň üstüne UEFA Çempionlar ligasynyň kubogyny hem goşan “Bawariýa” bir möwsümde 3 çempionlyga eýe boldy. Ol 2013-nji ýyldan soň, bu üstünligini gaýtalamagy başardy. Ol muny 2 gezek başaran 2-nji topar bolup, “Bawariýadan” ozal, “Barselona” 2009-njy hem-de 2015-nji ýyllarda 3 esasy ýaryşda ýeňiji bolupdy. “Bawariýa” UEFA Super Kubogy duşuşygynda Ýewropa Ligasynyň çempiony “Sewilýa” bilen duşuşar. Duşuşyk 24-nji sentýabrda Budapeştde oýnalar.
