Kino sungatynyň meşhur jansyzy Jeýms Bonduň keşbini janlandyran ilkinji aktýor, şotlandiýaly ussat artist Ser Şon Konneri 90 ýaşy arka atdy. 1930-njy ýylyň 25-nji awgustynda Şotlandiýanyň Edinburg şäheriniň Fantynbrij şäherçesinde dünýä inen Şon Konneriniň ejesi tämizlikçi bolup, kakasy fabrikde işleýärdi. Ýaşlyk ýyllarynda dürli işlerde işlän Şon 1950-nji ýylda “Mr. Universe” bäsleşiginde 3-nji ýeri eýeleýär. Şondan soň, kem-kemden sungat älemine aralaşyp başlan Şon Konneri 1954-nji ýylda Ýazdaky leglekler filminde kiçeňräk keşpde çykyş edýär. Şondan bäri-de 70-den gowrak filmde dürli keşpleri janlandyran aktýoryň iň esasy bilinýän keşbi Jeýms Bonduň keşbidir. Ol 1962-193-nji ýyllar aralygynda “Jeýms Bond” filmleriniň 6-ysynda, baş keşbi, Jeýms Bonduň keşbini janlandyrýar. Bulardan başga-da aktýor “Marni” (1964), “Gündogar ekspressinde jenaýat” (1974), “Şa bolmak isleýän adam” (1975), “Gülüň ady” (1986), El degirmesizler” (1987), “Indiana Jons hem-de soňky başdan geçirme” (1989), “Gaýa” (1996), “Forresteriň gözleginde” (2000) ýaly meşhur kinolarda surata düşdi.
Ser derejesini alan aktýor 1987-nji ýylda ekranlara çykan “El degirmesizler” filmindäki keşbi üçin ikinji plandaky iň gowy aktýor diýlen ugurda Oskar baýragyna laýyk görüldi. BAFTA baýraklarynda 2, Altyn globus-da 3 heýkeljik alan aktýoryň ýeke ogly bar.
