“Apple” kompaniýasynyň ertir agşam (15-nji sentýabr) täze enjamlaryny tanyşdyrmagyna garaşylýar. Kompaniýa däp bolşy ýal her ýylyň sentýabr aýynda täze enjamlary barada giňişleýin maglumat berýär. Bazary seljerijiler amerikan kompaniýasynyň “iPad Air 4” planşetini hem-de “Watch Series 6” “akylly sagat seriýasyny tanyşdyrjakdygyny belleýärler. Sabyrsyzlyk bilen garaşylýan “iPhone 12” seriýasyna degişli smartfonlaryň bolsa, indiki aý aýratyn dabarada tanyşdyrylmagyna garaşylýar.
Ertir görkeziljek “iPad Air 4”-iň “iPad Pro”-lara meňzeş boljakdygy bellenilýär. Enjamyň bahasynyň amerikan bazarynda 569-599 dollar aralygynda satylmagyna garaşylýar. Mundan ozal enjamyň bahasynyň 499 dollar boljakdygy aýdylypdy. Eýesini ýüzünden tanaýan “Face ID” ýerine, barmagyň yzyny okaýan “Touch ID” howpsuzlyk açary bilen üpjün ediljek enjamyň ululygynyň 11 dýuým bolmagyna garaşylýar.
“Watch Series 6”-da bolsa ozalkylardan tapawutlylykda gök reňkli görnüşi bolar. Häzire çenli ulanylmadyk bu reňkiň “iPhone 12”-lerde hem bolmagyna garaşylýar. Sagadyň ulanyjylaryň saglygy barada has köp maglumat bermegine garaşylýar.
Ýakyn geljekde peýda boljak “iPhone 12”-niň bolsa , 4 modeli bolar. Olar – “iPhone 12”, “12 Max”, “iPhone 12 Pro” we “Pro Max”.
Şeýle hem, “AirPods Studio” gulaklygy görkeziler.
Bulardan başga-da kompaniýa “AirTags” atly beýleki “Apple” enjamlaryny tapyp bolýan enjam tanyşdyrar. Ýanyňda göterip bolýan bu enjamy açara dakylýan hökmünde hem ulanyp bolar.
