Futbol boýunça Türkmenistanyň Milli çempionatynda 3-nji aýlawyň duşuşyklaryna badalga berildi. 15-nji tapgyryň çäklerinde geçirilen 4 duşuşykda ýer eýeleri ýeňşini baýram etdi. Ilki oýnalan 2 duşuşykda ýer eýeleri iň kiçi hasap bilen, ýagny 1-0 hasabynda ýeňiş gazandylar. Şol gün “Köpetdag” topary “Energetikden”, “Şagadam” hem “Aşgabat” toparyndan 1-0 hasabynda üstün çykdy. “Köpetdaga” ýeňiş getiren ýeke-täk goly 90+2-nji minutda Resul Mahmudow, “Şagadama” 3 utuk gazandyran goly bolsa, 45-nji minutda Ýewgeniý Tkaçenko derwezä girizdi.
Ertesi güni oýnalan duşuşyklarda ýer eýeleri 3 utugy 3 golly ýeňişler bilen gazandylar. Ýagny soňky çempion “Altyn asyr” topary “Merwi” 3-1, “Ahal” bolsa, “Nebitçini” 3-0 hasabynda ýeňlişe sezewar etdi. iki oýunda ýeňiş gazanan toparyň gollary bir meňzeşräk wagtlarda derwezä girizildi. 15-nji minutda Amangeldi Saparowyň goly bilen öňe saýlanan “Merwiň” derwezesinden ýeňiş gollaryny çempion toparyň oýunçylaryndan 22-nji minutda penaltiden Myrat Annaýew, 37-nji minutda Zafar Babajanow hem-de 48-nji minutda Mihail Titow geçirdi. Şeýle-de jogapsyz 3 gol geçiren “Ahalyň” adyndan 23-nji minutda Seýitmämmet Hojamämmedow (öz derwezesine), 30-njy (penalti) we 48-nji minutlarda Elman Tagaýew tapawutlandy. Türkmenistanyň Milli çempionatynda nobatdaky tapgyryň oýunlary 7-nji oktýabrda geçiriler. Şol gün “Aşgabat”–“Köpetdag”, “Merw”–“Energetik”, “Nebitçi”–“Şagadam” hem-de “Altyn Asyr”–“Ahal” duşuşyklary oýnalar.
