UEFA Çempionlar ligasynda “E”, F”, G”, H” toparçalarynda 5-nji duşuşyklar oýnaldy. Bu duşuşyklardan soň, “Borussiýa Dortmund” ýaryşy dowam etdirmäge hukuk gazandy.
“E” toparçada “Krasnodar” öz meýdançasynda Markus Bergiň ýeke-täk goly bilen “Renni” 1-0 ýeňip, Ýewropa ligasynda çykyş etmäge hukuk gazandy. Ýaryşyň debýutanty “Krasnodar” Çempionlar ligasynyň toparçalarynda ýeňiş gazanan 129-njy topar boldy. Mälim bolşy ýaly, Çempionlar ligasynyň toparçalarynda 145 topar çykyş etdi. 1/8 finala ozal çykan “Sewilýa” bilen “Çelsiniň” arasyndaky oýunda iňlis kluby 4–0 hasabynda ýeňiş gazanyp, toparçada 1-nji ýeri eýeledi. “Çelsiniň” 4 goluny fransiýaly hüjümçi Oliwie Žiru derwezä girizdi. 34 ýaşly oýunçy Çempionlar ligasynda het-trik eden iň ýaşuly futbolçy boldy. Umumylykda-da bu ýaryşda Ferenç Puşkaşdan (1965) soň het-trik eden iň ýaşuly 2-nji futbolçy hökmünde hasaba alyndy.
“F” toparçada öz meýdançasynda “Lasio” bilen 1–1 deňme-deň oýnan “Borussiýa Dortmund” 1/8 finala adyny ýazdyrmagy başardy. “Klub Brýugge” bolsa “Zenitden” 3–0 üstün çykyp, Çempionlar ligasynda 12 oýundan soň öz meýdançasynda ýeňiş gazandy.
“G” toparçadaky 2 oýun hem edil geçen tapgyrdaky ýaly birmeňzeş hasaplar bilen tamamlandy. “Barselona” ýene-de Messisiz oýnan oýnunda myhmançylykda “Ferenswaroşdan” 3-0 üstün çykyp, katalonlaryň gollaryny Grizmann, Breýtweýt hem-de Dembele geçirdi. “Ýuwentus” hem “Dinamo Kiýewi” 3–0 ýeňdi. Oýunda Kieza, Ronaldo hem-de Morata tapawutlandy. 57-nji minutda tapawutlanan Kristiano Ronaldo karýerasyndaky 750-nji goluny geçirdi (“Real Madrid” – 450 gol, “Mançester Ýunaýted” – 118, Portugaliýanyň milli ýygyndysy – 102 gol, “Ýuwentus” – 75, “Sporting” – 5).
“H” toparçadaky oýunlarda 11 gol geçirilip, 3 topar 9 utuk bilen 1/8 finala çykmak ugrunda ýiti göreş alyp barýar. Tapgyryň merkezi oýnunda PSŽ myhmançylykda “Mançester Ýunaýtedi” 3–1 hasabynda ýeňdi. Duşuşykda Neýmar 2 gezek tapawutlandy. “Istanbul Başakşehir” bilen “Leipsigiň” arasyndaky oýunda türk klubunyň oýunçysy Irfan Kahweji 3 gol geçirdi. Çempionlar ligasynda het-trik eden 4-nji türk futbolçy bolan Kahweji het-trik edip utulan 3-nji oýunçy (Ronaldo, Beýl) hökmünde hasaba alyndy.
Şunlukda, “Bawariýa”, “Mançester Siti”, “Çelsi”, “Sewilýa”, “Barselona”, “Ýuwentus”, “Liwerpul”, “Porto” hem-de “Borussiýa Dortmund” toparlary 1/8 finalçylar bolup, 6-njy oýunlardan soň, olaryň hataryna ýene-de 7 klub goşular.
“Krasnodar” – “Renn”: 1–0 (Markus Berg 71)
“Sewilýa” – “Çelsi”: 0–4 (Oliwie Žiru 8, 54, 74, 83 p)
“Borussiýa D” – “Lasio”: 1–1 (Guerreiro 44 – Immobile 67 p)
“Klub Brýugge” – “Zenit”: 3–0 (De Ketelaere 33, Wanaken 58 p, Lang 73)
“Ýuwentus” – “Dinamo K”: 3-0 (Kieza 21, Ronaldo 57, Morata 66)
“Ferenswaroş” – “Barselona”: 0-3 (Grizmann 14, Breýtweýt 20, Dembele 28 p)
“Istanbul BŞ” – “Leipsig”: 3-4 (Kahweji 45+3, 72, 85 – Poulsen 26, Mukiele 43, Olmo 66, Sorlot 90+1
“Mançester Ýunaýted” – “Pari-Sen Žermen”: 1-3 (Reşford 32 – Neýmar 6, 90+1, Markinios 69)
