Angliýanyň FA Kubogynyň ýaryşynyň finalynda “Çelsi” bilen “Lester Siti” duşuşar. “Çelsi” ýarym finalda “Mançester Sitini” 1-0 hasabynda ýeňdi. Londonlylara ýeňiş getiren ýeke-täk goly 55-nji minutda Hakim Ziýeş öz adyna ýazdyrdy. Edil şonuň ýaly 55-nji minutda geçirilen gol bilen ýeňiş gazanylan oýunda “Lester Siti” topary Southamptondan 1-0 üstün çykdy. “Lesteri” finala çykaran ýeke-täk pökgini Kaleçi Iheanaço tora girizdi. 15-nji gezek finala çykan “Çelsi” şolaryň 8-sinde kubogy eýeläpdi. Londonlylar soňky 5 ýylda 4-nji gezek finala çykyp, olar diňe 2018-nji ýylda kuboga mynasyp bolupdylar. Şu wagta çenli bu kubogy alyp bilmedik “Lester Siti” 1969-njy ýyldan soň 1-nji, umumylykda-da 5-nji gezek finalda oýnar. Dünýäniň iň gadymy futbol bäsleşigi bolan FA Kubogynyň finaly 15-nji maýda Wembley stadionynda oýnalar.
