Milli mukaddesligimiz bolan ak bugdaýy başynyň täjine deňeýän halkymyz geçen hepde hormatly Prezidentimiziň ak pata bermeginde il sylagly ýaşulularyň «Bismillasy» bilen ýurdumyzyň Ahal, Mary, Lebap welaýatlarynda galla oragyna girişdi. Balkan we Daşoguz welaýatynyň gallaçylary hem 11-nji iýunda galla oragyna guramaçylykly girişerler.
Berkarar döwletimiziň bagtyýarlyk döwründe ýurdumyzda oba hojalygyny ösdürmek boýunça toplumlaýyn çäreler amala aşyrylýar. Döwletimiz oba hojalyk ekinlerinden bol hasyl almak üçin ähli zerur şertleri döredýär. Daýhanlar ýokary hilli tohumlar, mineral dökünler, himiki serişdeler, döwrebap oba hojalyk tehnikalary we suwaryş suwy bilen doly üpjün edilýär.
Edermen gallaçylaryň yhlasly zähmeti netijesinde şu ýyl ýurdumyzyň welaýatlarynda bugdaýyň bol hasyly ösdürilip ýetişdirildi. Hormatly Prezidentimiziň – Galla hasylyny ýitgisiz ýygnap almak, halkymyzy azyk önümleri bilen doly üpjün etmek üçin azyk bolçulygyny pugtalandyrmak möhümdir – diýen öwüt-ündewlerinden ruhlanan edermen gallaçylar yhlasly zähmet çekip, täze üstünlikleri gazanýarlar.
Şu ýyl ýurdumyzyň gallaçylary 690 müň gektar meýdandan 1 million 400 müň tonna däne ýygnamagy meýilleşdirýärler. Galla meýdanlarynda bugdaýyň «Sähraýy», «Juwan», «Bereketli», «Ýolöten-1», «Ýolöten-3», «Türkmenbaşy-1», «Goşant», «Miras», «Rowaç», «Hasylly» hem-de «Watan» ýaly ýokary hasylly görnüşleri ekildi.
Döwletimiz tarapyndan suw, naýbaşy tohum, dökün, tehnika bilen üpjünçiligiň ýokary bolmagy edermen gallaçylaryň yhlasyna yhlas goşýar. Hormatly Prezidentimiziň parasatly baştutanlygynda amala aşyrylýan oba özgertmeleri daýhanlaryň ruhlaryny göterýär. Milli Liderimiziň oba hojalyk ekinlerinden bol hasyl ýygnamak baradaky tabşyryklaryny üstünlikli ýerine ýetirmek üçin ähli şertler we mümkinçilikler döredildi.
Mukaddes Garaşsyzlygymyzyň şanly 30 ýyllyk baýramynyň uly tutum bilen toýlanylýan ýylynda gallaçylar ýylboýy çekilen zähmetiň rehnedini görýärler. Olaryň ösdürip ýetişdiren galla hasyly gysga wagtyň içinde mähriban Watanymyzyň galla harmanyny doldurdy.
Häzirki döwürde ýurdumyz azyklyk galla bilen içerki islegleri doly kanagatlandyryp, dünýäde azyk bolçulygyny döretmäge mynasyp goşant goşýan, bugdaýy eksport edýän döwletleriň hatarynda ynamly orun aldy. Ýokary hilli çörek we çörek önümleri, un halkymyza elýeterli bahalardan hödürlenilýär. Bugdaýyň we pagtanyň döwlet satyn alyş nyrhlarynyň ýokarlandyrylmagy oba zähmetkeşleriniň işe höwesini has-da artdyrýar.
Oba hojalyk ekinleriniň iň gadymylarynyň we esasylarynyň biri bolan ak bugdaý bereketli topragymyzda has irki döwürlerden bäri ösdürilip ýetişdirilýär. Ýetişdirilen bereketli hasylyň ýekeje dänesini-de isrip etmän ýygnap almak üçin däne orýan kombaýnlaryň giňden peýdalanylmagy oba zähmetkeşleriniň buýsanjyny beýgeldýär. Milli Liderimiziň tagallasy bilen her ýyl oba hojalyk tehnikalarynyň täze görnüşleri satyn alynýar. Dünýäniň öňdebaryjy önüm öndürijilerinden satyn alynýan tehnikalar oba zähmetkeşleriniň esasy ýardamçysy bolýar. Olar täze hem-de döwrebap tehnikalardan peýdalanyp, oba hojalygy üçin gymmatly bolan önümleriň bol hasylyny ýetişdirýärler.
Halkymyzyň rysgaly we azyk garaşsyzlygymyzyň kepili bolan bugdaýyň bol hasylyny öndürmek babatda uly aladalar edýän Gahryman Arkadagymyzyň jany sag, ömri uzak bolsun, il-ýurt bähbitli tutumlary hemişe rowaçlyklara beslensin!
Batyr AŞYROW,
S. A. Nyýazow adyndaky Türkmen oba
hojalyk uniwersitetiniň uly mugallymy.
