Ýewropa çempionatynda 4-nji günüň oýunlarynda garaşylmadyk netijeler hasaba alyndy. Günüň birinji duşuşygynda Şotlandiýa Glazgo şäherindäki “Hampden Park” stadionynda Çehiýa bilen duşuşdy. Çekeleşikli geçen oýun 2-0 hasabynda çehleriň peýdasyna tamamlandy. Gollaryň ikisini hem 42-nji we 52-nji minutlarda Patrik Şik öz adyna ýazdyrdy. 25 ýaşly hüjümçi 2-nji goluny 45,5 metr uzaklykdan derwezä girizdi. Bu gol 1980-nji ýyldan bäri Ýewropa çempionatynda iň uzak aralykdan geçirilen gol hökmünde hasaba alyndy. Milli ýygyndydaky soňky 11 duşuşykda 8 gezek tapawutlanan Şik meşhur hüjümçi Milan Baroşdan soň bir oýunça 2 gol geçiren ilkinji çehiýaly oýunçy boldy.
Günüň 2-nji duşuşygynda Polşanyň ýygyndysy Sankt-Peterburgda oýnalan oýunda Slowakiýadan 2-1 asgyn geldi. Oýnuň 18-nji minutynda slowakiýaly ýarymgoragçy Makyň batly uran urgusy ilki sütüne, soňra-da derwezeçä degip, tora girdi. Şeýlelikde, Woýseh Şensny bu ýaryşda öz derwezesinden gol geçirden ilkinji derwezeçi hökmünde hasaba alyndy. 2-nji ýarymyň başynda, 46-njy minutda polýaklar Karol Linettiniň goly bilen hasaby deňlediler. Oýnuň 62-nji minutynda-da 2-nji sary kartyny alan Gžegož Kryhowiýak meýdançadan çykaryldy. Şondan soň hüjümleriniň ýygjamlaşdyran slowaklar 69-njy minutda goragçy Milan Şkriniaryň goly bilen öňe saýlandy. Şeýlelikde, Slowakiýanyň ýygyndysy bu ýaryşyň taryhyndaky 2-nji ýeňşini gazandy.
Günüň jemleýji duşuşygynda Ispaniýanyň ýygyndysy Sewilýada Şwesiýa bilen duşuşdy. Çekeleşikli we bir taraplaýyn geçen oýunda hasap açylmady. Esasan hem birinji ýarymda we oýnuň ahyrlarynda yzygiderli paslaşyklardan soň hüjüm baryny eden ispanlara şwed goragçylaryny hem-de derwezeçisi Olseni geçmek başartmady. Garşylyklaýyn hüjümler bilen oýnan şwedler 2-3 sany örän amatly pursatdan peýdalanyp bilmediler. Şunlukda, oýun golsuz tamamlanyp, ol şu çempionatyň hasap açylmadyk ilkinji duşuşygy boldy. Oýunda topa 75 göterim erk edip, özara 849 gezek paslaşan ispanlar ýeňiş gazanyp bilmedi.
