Katar 2022 Dünýä Kubogynyň saýlama tapgyrynyň çäklerinde UEFA zolagynda “G” toparçada Niderlandlaryň ýygyndysy öz meýdançasynda Türkiýäniň ýygyndysyny kabul etdi. Birinji duşuşykda 4-2 asgyn gelen Niderlandlar bu gezek 6-1 hasabynda ýeňiş gazandy. Eýýäm 55-nji sekuntda başlan gol ýagyşynda 3 pökgini Memfis Depaý (16, 38 p, 54) öz adyna ýazdyrdy. Bu onuň milli ýygyndydaky ilkinji het-trigi bolup, ol 1997-nji ýyldan bäri Türkiýäniň ýygyndysynyň derwezesinden 3 gol geçiren ilkinji futbolçy hökmünde hasaba alyndy. Ýer eýeleriniň beýleki gollaryny-da Klassen (1), Till (80) hem-de Malen (90) derwezä girizdi. Bir oýunçysy gyzyl kart alan türkleriň ýeke-täk goluny 90+2-nji minutda Jengiz Ünder geçirdi. Şeýlelikde, Niderlandlar 13 utuk bilen 1-nji orna geçdi. Türkiýäniň ýygyndysy 1987-nji ýyldan soň ilkinji gezek bir duşuşykda derwezesinden 6 gol geçirtdi. Toparçadaky beýleki oýunlarda Erling Hollanyň het-trik eden duşuşygynda Norwegiýa Gibraltary 5-1 ýeňip, utugyny 13-e çykardy we 2-nji orna beýgeldi. Garadag bilen Latwiýanyň arasyndaky oýundan gol sesi eşidilmedi.
